7% by’Abaturarwanda bapfa ku munsi bicwa na SIDA

Minisitiri w’Ubuzima Dr Sabin Nsanzimana yatangaje ko nibura mu bantu 100 bapfa ku munsi mu Rwanda, barindwi baba bishwe na SIDA, ahanini bitewe no kutamenya ko bayanduye cyangwa gutinya ko bigaragarira abantu bose.

U Rwanda ni kimwe mu bihugu byashyize imbaraga mu guhangana n’indwara zandura n’izidandura mu myaka 30 ishize, bituma icyizere cyo kubaho cyiyongera kigera ku myaka 69 mu 2022.

Imibare y’Ikigo cy’Igihugu cy’Ubuzima, RBC, igaragaza ko mu Rwanda hose, abafata imiti igabanya ubukana bwa Virusi itera Sida barenga ibihumbi 220.

RBC igaragaza ko 95% bafata imiti neza, mu gihe 90% bagaragaza impinduka nziza z’igabanyuka ry’ubukana bwa virusi itera SIDA.

Ubwo hizizwaga umunsi mpuzamahanga wo kurwanya Sida kuri uyu wa 1 Ukuboza 2024, Minisitiri w’Ubuzima Dr Sabin Nsanzimana yagaragaje ko abantu bapfa muri rusange ku munsi ari 100, na ho abicwa na SIDA ari barindwi buri munsi.

Ati “Abantu 100 bapfa buri munsi mu Rwanda, na ho barindwi muri abo 100 ni abantu bafite ubwandu bwa Virusi ya Sida, barwaye SIDA. Bivuze ko SIDA ikiri ikibazo. Turacyahanganye n’ikibazo gikomeye ariko narebye mu mibare y’imyaka 10 ishize, byasaga n’aho byikubye gatatu karenga kuko icyo gihe bari abantu barenga 20 bapfa buri munsi bishwe na SIDA.”

Yahamije ko nubwo hari intambwe yatewe ariko imibare y’abahitanwa na SIDA ikiri hejuru cyane ugereranyije n’izindi mpamvu zihitana abantu kugira ngo bagere ku 100 ku munsi.

Ati “Abagipfa abenshi ni uko baba baratinze kubimenya, ibyuririzi bikaza noneho akaba ari bwo ajya gufata imiti kubera akato cyangwa se kugira ubwoba.”

Dr Nsanzimana yavuze ko buri munsi mu Rwanda haboneka ubwandu icyenda bushya bw’agakoko gatera SIDA.

Ati “Uyu munsi turamara aha turabona abantu icyenda bashya banduye Virusi ya SIDA, ejo bibe uko, ejobundi bibe uko kandi abenshi ni urubyiruko rw’imyaka 20, 19, 18, bivuze ko dufite byinshi byo gukora mu mwaka utaha ariko ugereranyije n’imyaka ishize aho twagiraga ubwandu bushya 25, ntabwo twakwiha intego y’umwaka utaha nibura tukagera kuri barindwi cyangwa batandatu?”

Ababyeyi banduza abana mu gihe cyo kubyara bavuye kuri 2% mu myaka yashize bagera kuri 0,9% mu 2024.

Ababyeyi batwite bitabwaho bagahabwa imiti igabanya ubukana bwa Virusi ya Sida hirindwa ko banduza abana batwite cyangwa mu gihe babyara.

Inkuru Wasoma: Abiga imyuga n’ubumenyi ngiro batsinze neza kurusha abo mu bumenyi rusange

Umuyobozi w’ishami rishinzwe kurwanya Virusi itera Sida mu Kigo cy’Igihugu gishinzwe Ubuzima, Dr Ikuzo Basile, yavuze ko kuri ubu batangiye gufata ingamba zikomeye zirimo kongera serivisi za Virusi itera Sida ku bigo nderabuzima byose, izo serivisi zigatangirwa Ubuntu. Ikindi ni ubukangurambaga kuko byagaragaye ko abantu badakoresha izo serivisi, turahamagarira buri wese kubigira inshingano ze kurwanya Virusi Itera Sida.”

Dr. Ikuzo yavuze ko kandi muri porogaramu y’uyu mwaka bagiye gutangira hari imiti ushobora gufata irimo nk’urushinge rumwe mu mezi abiri rukagufasha kwirinda kwandura Virusi itera Sida.

Bamwe mu baturage n’urubyiruko rwo mu Karere ka Rubavu, bavuze ko zimwe mu mpamvu zituma Virusi itera Sida yiyongera bituruka ku bantu batari bumva akamaro ko gukoresha agakingirizo ndetse n’akamaro ko kwipimisha.

Tabu Vestine utuye mu Murenge wa Nyamyumba yagize ati “Impamvu ituma Virusi itera Sida yiyongera abagabo benshi ntabwo bagikunda kwambara agakingirizo kandi ubimenya ari uko mwageze ku buriri, Leta niyongere udukingirizo natwe abagore bajye batuduha kugira ngo twirinde, niyanga kukazana asange ugafite iwawe ibi bizadufasha cyane.”

Mukombozi Jean Bosco wiga mu mwaka wa gatanu w’amashuri yisumbuye, we yavuze ko ikigare kibi kiri mu biri gushuka urubyiruko cyane bakumva ko agakingirizo katari ngombwa.

Ati “ Ikindi abenshi bishyizemo ko iyo asiramuye adashobora kwandura mu gihe abakobwa bo abenshi banduzwa n’abantu bakuru babaha amafaranga kubera kurarikira iby’isi. Leta icyo yakora niyongere ubukangurambaga bwinshi mu mashuri, abandi babasange mu tubari bababurire, babereke uko bagenzi babo bari kwandurira muri ibi bigare ibi bizafasha benshi.”

Imibare igaragaza ko abagore bakora uburaya ari bo benshi bafite ibyago byo kwandura virusi ya SIDA, bagera kuri 35%, umubare wagabanyutse ku muvuduko muto cyane kuko mu myaka 10 ishize bari 50%.

Mu myaka yashize hashyizweho utuzu dutangirwamo udukingirizo ku buntu mu mijyi itandukanye ariko bamwe bagira isoni zo kujya kudufata, ibituma ubwandu bushya bukomeza kwiyongera.

Minisitiri Nsanzimana yasabye abataripimishije n’abakeka ko banduye kwipimisha hakiri kare kugira ngo batajya mu mubare w’abazahitanwa na yo cyangwa bakaba mu bayikwirakwiza.

Inzego z’ubuzima zagaragaje ko abahitanwa na SIDA buri munsi ari 7% by’ababa bapfuye