Fabrice Nahimana Leta Zunze Ubumwe za Amerika zafatiye ibihano abacuruzi babiri b’Abanyarwanda n’ibigo bine bikorera mu Rwanda, ibishinja kugira uruhare mu gutera inkunga umutwe wa March 23 Movement (M23) binyuze mu bucuruzi butemewe bw’amabuye y’agaciro ava mu burasirazuba bwa Congo.
Mu itangazo ryashyizwe ahagaragara n’Urwego rwa Leta ya Amerika rushinzwe Imari (US Department of the Treasury), rivuga ko ibi bihano bigamije guhagarika imiyoboro ivugwaho gukura amabuye y’agaciro muri DRC mu buryo bunyuranyije n’amategeko, amafaranga avuyemo agakoreshwa mu gutera inkunga umutwe wa M23.
Abafatiwe ibi bihano ni Jean Malic Kalima, uyobora Gasabo Gold Refinery, na Bosco Kayobotsi, umuyobozi mukuru w’icyo kigo. Hari kandi ibigo bine byashyizwe ku rutonde rw’ibihano birimo Gasabo Gold Refinery Ltd, Bugambira Mines Ltd, Wolfram Mining and Processing Ltd, na Rwinkwavu Mining Corporation Ltd.
Amerika ivuga ko iki cyemezo kiri mu rwego rwo kongera igitutu ku miyoboro ifasha gukomeza intambara imaze imyaka myinshi ibera mu burasirazuba bwa DRC, ahari ubukungu bushingiye ku mabuye y’agaciro bwakomeje kuba imwe mu mpamvu zongera amakimbirane.
Ku rundi ruhande, Guverinoma y’u Rwanda yahakanye ibyo ishinjwa. Minisitiri w’Ububanyi n’Amahanga w’u Rwanda, Olivier Nduhungirehe, yavuze ko ibi bihano bibogamye kandi bidafite ishingiro. Yavuze ko ibihano bidashobora, byonyine, gukemura ikibazo cy’umutekano muke mu burasirazuba bwa DRC, ahubwo ko amahoro arambye asaba ubufatanye bw’ibihugu byo mu karere aho gushinja uruhande rumwe.
Umutwe wa M23 nawo wahakanye ko wungukira mu bucuruzi bw’amabuye y’agaciro. Abawuvugira bavuga ko amabuye acuruzwa n’abacukuzi ku giti cyabo, mu gihe abarwanyi ba M23 bavuga ko inshingano yabo ari ukurinda umutekano w’ahacukurwa ayo mabuye. Banashinja Guverinoma ya Kinshasa gukoresha ibyo birego mu rwego rwo guhisha ibibazo ihura na byo ku rugamba no mu rwego rwa dipolomasi.
