Fabos Fali 
Ubushinjacyaha bw’Igisirikare cya Repubulika Iharanira Demokarasi ya Congo bwasabye urugereko rw’ubujurire mu Rukiko rwa Kinshasa ko rwakwemeza igihano cy’urupfu abantu 37 bakatiwe nyuma yo guhamywa uruhare mu gikorwa cyo kugerageza gukuraho ubutegetsi bwa Perezida Félix Tshisekedi.
Igerageza ryo gukuraho ubu butegetsi ryabaye tariki ya 19 Gicurasi 2024, riyoborwa na Christian Malanga wari ufite ubwenegihugu bwa RDC na Leta Zunze Ubumwe za Amerika, we wiciwe ku ngoro y’Umukuru w’Igihugu i Kinshasa.
Mu rubanza rwa mbere, haburanishwaga abantu 51 bashinjwaga kugira uruhare muri iki gikorwa, gusa urukiko rwa gisirikare tariki ya 13 Nzeri 2024 rwemeje ko 14 muri bo ari abere.
Abantu 37 bahamijwe kugerageza gukura Tshisekedi ku butegetsi, barimo abanyamahanga, barajuriye, basaba urukiko kubagira abere. Umunye-Congo ufite ubwenegihugu bw’u Bubiligi, Jean-Jacques Wondo, we yasobanuraga ko ntaho ahuriye n’iki gikorwa.
Umushinjacyaha Col Parfait Mbutamutu Awirande, kuri uyu wa 10 Mutarama 2025 yasabye urukiko rw’ubujurire kwemeza ishingiro ry’icyemezo cy’urukiko rubanza kugira ngo igihano cy’urupfu bakatiwe kigumeho.
Kuri Wondo wahoze ari umujyanama mu mavugurura y’urwego rw’iperereza rwa RDC, Col Mbutamutu, yabwiye urukiko ko nubwo uregwa atari kumwe n’abagerageje gukura Tshisekedi ku butegetsi, ari umwe mu bagize uruhare rukomeye muri iki gikorwa kuko ngo yakoranaga na Malanga.
Byahishuwe ko Wondo yagambaniwe
Televiziyo RTBF yo mu Bubiligi mu Ukuboza 2024 yahishuye ko gufatwa kwa Wondo kwaturutse ku kagambane k’abakorera mu rwego rw’iperereza rwa RDC, bari bamufitiye urwango bitewe n’impinduka yifuzaga ko zibamo.
Mu rubanza rwa mbere, Ubushinjacyaha bwasobanuriye urukiko ko umukozi ushinzwe kwakira abakiriya kuri hoteli ya Wondo witwa Malusha, yabubwiye ko Wondo yari asanzwe akorana by’ako kanya na Malanga.
Ubwo urubanza rwabaga, ntabwo Ubushinjacyaha bwajyanye Malusha mu rukiko kugira ngo ahe abacamanza ubu buhamya, ahubwo bwasobanuye ko yaburiwe irengero.
Ku wa 10 Ukuboza 2024, abanyamategeko ba Wondo bagejeje Malusha mu rukiko, basobanura ko atari yaraburiwe irengero nk’uko Ubushinjacyaha bwabivuze, ahubwo ko yari afungiwe muri gereza.
Malusha yabwiye urugereko rw’ubujurire ko abashinjacyaha bari bamaze amezi menshi bamutoteza kugira ngo yemere kubeshyera Wondo. Ubuhamya bwe bwagaragaje ko hari ukuri Ubushinjacyaha butashakaga kugaragaza.
U Bubiligi ni kimwe mu bihugu byamaganye ikatirwa rya Wondo, bugaragaza ko buzakomeza gukurikiranira hafi iyi dosiye.
Fabos Fali 
