Fabos Fali Ihuriro ry’abakozi b’uruganda rwo muri Koreya y’Epfo rukora imodoka, Hyundai Group ryatangaje ko abarigize bazahurira mu myigaragambyo igamije kweguza Perezida w’iki gihugu, Yoon Suk Yeol.
Biteganyijwe ko iyi myigaragambyo y’abakozi ba Hyundai izaba ku wa Kane no ku wa Gatanu.
Amakuru dukesha Reuters avuga ko iyi myigaragambyo izajya ikorwa amasaha ane ku munsi, hagamijwe kweguza Perezida wa Koreya y’Epfo.
Perezida Yoon Suk Yeol amaze amasaha make ari ku gitutu cy’abamusaba kwegura nyuma y’aho atangaje ibihe bidasanzwe, agamije kwivuna abo ahamya ko ari abanzi b’igihugu bakorana na Leta ya Koreya ya Ruguru.
Perezida Yoon yatangarije iki cyemezo kuri televiziyo y’igihugu ku mugoroba wo kuri uyu wa 3 Ukuboza 2024, asobanura ko hari abadepite bafite umugambi wo gukuraho abayobozi b’ingenzi muri Guverinoma n’abashinjacyaha bakuru, kandi ngo bamaze igihe bagerageza guhagarika ubuzima bw’igihugu.
Hashingiwe ku cyemezo cy’Umukuru w’Igihugu, ku ngoro y’Inteko yiganjemo benshi batavuga rumwe n’ubutegetsi hoherejwe abapolisi n’abasirikare, bari biteguye guta muri yombi abitwa “abanzi b’ibihugu”.
Muri iki gihugu hahise havuka imyigaragambyo yo kweguza Umukuru w’Igihugu ndetse n’abagize Inteko Ishinga Amategeko barabishimangira, nubwo Perezida yamaze kwemera gukuraho ibi bihe bidasanzwe.
Fabos Fali 