Fabos Fali 
Umuyobozi Mukuru wa Kaminuza y’u Burundi, Audace Manirabona, yandikiye Minisitiri w’Uburezi n’Ubushakashatsi bushingiye kuri siyansi, amumenyesha ko abakozi b’iyi kaminuza bakomeje gusezera bitewe n’imibereho mibi.
Mu ibaruwa Manirabona yanditse tariki ya 16 Ukuboza 2024, yasobanuye ko muri uyu mwaka wonyine, abakozi 118 bamaze gusezera. Biyongera kuri 43 basezeye mu 2023 na 27 basezeye mu 2022.
Manirabona yasobanuye ko tariki ya 15 Ukuboza 2024 gusa, hasezeye abarimu 41, agaragaza impungenge z’uko ibikorwa by’iyi kaminuza bishobora guhagarara, ikaba yanafunga imiryango.
Yabajije ati “Ni gute umuntu wabonye aho yahembwa amadolari 4000 ku kwezi, yaguma aho ahembwa amadolari ari munsi ya 200? Ibi ntibikwiye. Abantu bagomba kumva ko iki kibazo kitazagira aho kitugeza.”
Desire Nisubira wigisha muri iyi kaminuza, yasobanuye ko abarimu badafite ubushobozi bwo kwishyura ubukode bw’inzu ndetse no guhaha bitewe n’umushahara muke cyane. Yagaragaje ko mu bindi bihugu birimo u Rwanda ho bagenzi babo bahembwa neza.
Yagize ati “Ntabwo bikwiye ko umwarimu wa kaminuza atonda umurongo, ategereje bisi. N’iyo yaba afite imodoka, nta peteroli yabona. Arakomeza kuba muri ubwo buzima ate kandi yabona ahari ubuzima bwiza?”
Nisubira yagaragaje ko iyo umworozi ashaka amata, agaburira inka ze ubwatsi buhagije. Yasobanuye ko abakozi bo muri Kaminuza y’u Burundi bakwiye guhabwa umushahara ufatika kugira ngo batange umusaruro.
Fabos Fali 
