Ubwo umuhanzi Kitoko Bibarwa yari mu rugendo rw’amasomo ye ya kaminuza y’icyiciro cya gatatu (Masters) yiseguye ku bakunzi be n’ab’umuziki we ababwira ko nta kuntu yari gushobora guhuza byombi ngo ajye abagezaho indirimbo, icyakora abasezeranya ko ari hafi kugaruka. Kuri ubu uyu muhanzi wakunzwe cyane n’abatari bake yavuze ko ari hafi gushyira indirimbo hanze.

Kuri uyu wa 9 Ukwakira 2023 Kitoko yatangaje ko agiye gushyira hanze indirimbo ihimbaza Imana yise ‘Uri Imana’ indirimbo y’ivugabutumwa igaruka ku guhimbaza Imana. Iyi ndirimbo yatunganyijwe mu buryo bw’amajwi na Lick Lick, aho Kitoko yavuze ko azayishyira hanze mu gihe kidatinze.

Hari hashize imyaka ine Kitoko adashyira indirimbo hanze kuko iherutse ni ‘Winema’, icyakora nubwo shene ye ya Youtube igaragaza ko amaze imyaka 7 mu muziki, ariko Kitoko amaze imyaka 15 mu muziki kuko yatangiye umuziki muri 2008. Yakunzwe cyane muri Rurabo, Pole Pole n’izindi.