Abana babiri bigaga mu mashuri abanza barohamye mu mugezi wa Nyabarongo bahasiga ubuzima. Abo bana ni Niyomukiza Eric w’imyaka 11 na Niyomugabo Claude w’imyaka 9 y’amavuko bari batuye mu mudugudu wa Nyabivumu, akagali ka Bweramvura, Umurenge wa Kinihira akarere ka Ruhango.

Amakuru avuka aba bana bagiye kwakira ubwatsi bw’amatungo bashaka koga muri Nyabarongo irabatwara. Umunyamabanga nshingwabikorwa w’umurenge wa Kinihira, Uwamwiza Jeanne yavuze ko urupfu rw’aba bana rwabaye ku mugoroba wo kuwa 12 Nyakanga 2023.

Gitifu Uwamwiza yavuze ko ubwo aba bana bavaga ku masomo, bagiye kwahira ubwatsi bw’amatungo ariko bashaka koga batabizi bararohama, ndetse ababarohoye bakaba barasanze bamaze gushiramo umwuka, imirambo ya bo ikaba iri mu bitaro.

Yihanganishije imiryango y’aba bana. Imirambo y’aba bana iri mu bitaro bya Gitwe kugira ngo ikorerwe isuzumwa.

SRC: UMUSEKE