Umuvugizi wa polisi y’u Rwanda, ACP Rutikanga Boniface yemeje amakuru y’uko abana batanu batawe muri yombi na polisi nyuma yo gutera amabuye imodoka yari itwaye ikipe ya Al Hilal Benghazi mu myitozo bakomeretsa umutoza wayo nyuma yo kuyimena ikirahure. Aba bana bakoze ibi ku gicamunsi cyo kuwa 28 Nzeri 2023 ubwo Al Hilal Benghazi yari igeze kuri KigaliPelé stadium.

ACP Rutikinga yavuze ko aba bana bakomerekeje byoroheje umutoza ku jisho icyakora bakaba bashyikirijwe RIB kugira ngo ibakoreho iperereza hamenyekane icyabibateye.

Kuri uyu wa 30 Nzeri 2023, Al Hilal Benghazi irakina na Rayon Sports aho Gikundiro iraba yayakiriye mu mukino wo kwishyura wa CAF Confederation Cup, nyuma y’uko mu mukino ubanza aya makipe yombi yari yanganyije igitego 1-1.