Ku kigo nderabuzima cya Save mu karere ka Gisagara, kuwa mbere tariki 7 Kanama 2023 mu gitondo hari hamaze kwakirwa abantu bagera kuri 74 nyuma y’uko ku cyumweru bari banyweye ubushera bikekwa ko buhumanye. Amakuru avuga ko ubushera aba babunyoye mu bukwe, ndetse n’inzego z’ubuyobozi zikaba zarahise zikurikirana ababunyoye ngo bavurwe hakiri kare.

Hari n’aboherejwe mu bitaro bya Kabutare ngo bitabweho. Umwe mu baganiriye na RBA, yavuze ati “Ejo habaye kugera mu rugo kw’Abageni, abantu bose bajyanyeyo ibiseke bakahanywa ubu bose barimo hano mu bitaro. Niba bararoze ikigage, niba ari umutobe, ariko ni ibyo binyobwa bya Kinyarwanda baroze.”

Uyu mugabo yavuze ko umugore we yafashwe mu nda mu gitondo bituma atajya mu kazi ke ko guhinga kubera ubu burwayi. Yakomeje avuga ko batari babizi ariko bahamagawe na Mutekano w’Umudugudu abasaba kujya kwa muganga kugira ngo bavurwe. Yakomeje avuga ko abaganga bari gukorwa ibishoboka byose kuburyo hari n’abari kumererwa neza nubwo hari abarembye.

Si ubwa mbere amakuru nk’aya yavugwa, kuko mu kwezi gushize kwa Nyakanga mu karere ka Rwamagana, abantu baguze ubushera babunyweye umwe arapfa abandi bajyanwa kwa muganga. Icyakora kugeza ubu ubuyobozi bwa Gisagara ntacyo buravuga kuri iki kibazo.