Abantu 10 bagwiriwe n’umukingo babiri bahasiga ubuzima abandi umunani barakomereka ubwo abaturage bari mu bikorwa byo kubaka urukuta ku mukingo wo ku Rwibutso rwa Jenoside yakorewe Abatutsi muri Jenoside rwa Rwamatamu ruherereye mu murenge wa Gihombo mu karere ka Nyamasheke.

Ibi byabaye kuri uyu wa 2 Ukwakira 2023 saa ine n’igice aho abo baturage barimo bubaka urukuta rw’amabuye kuri uwo mukingo nyuma itaka rikariduka rikabatwikira. Aya makuru yamejwe n’umuyobozi w’agateganyo w’Akarere ka Nyamasheke Muhayeyezu Joseph Desire, avuga ko abantu babiri bapfuye abandi 8 bakomeretse kuri ubu bajyanwe mu bitaro bya Mugonero kugira ngo bitabweho n’abaganga.

Meya Muhayeyezu yavuze ko mu bantu 8 bakomeretse, bane muri bo barembye bikomeye abandi 4 bakaba bakomeretse byoroheje. Yavuze ko uyu mukingo wari usanzwe ukorwaho n’abakozi 81 ariko byabaye hari 41 bakaba bari gukomeza gukuraho itaka kugira ngo barebe niba nta wundi waba wasigayemo ntibabimenye.

Iriduka ry’uyu mukingo ryaturutse ku kuba itaka ryaroroshye kubera imvura imaze iminsi igwa hiyongeraho n’ubuhaname bwawo.