Polisi ya kiyisilamu muri Nigeria izwi ku izina rya Hisbah, yataye muri yombi Abayisilamu 11 bafashwe bari kurya mu gisibo cya Ramadhan, bafatiwe muri Leta ya Kano yo mu Majyaruguru y’iki gihugu.

Umuvugizi wa Hisbah, Lawal Fagge, yatangaje ko hafashwe abagabo 10 hafi y’amasoko, ndetse n’umucuruzi w’umugore wafashwe arya ku bicuruzwa bye mu masaha atemewe. Ati “Twabonye abantu 11 barimo umudamu ugurisha ibinyomoro byagaragaye ko arya ku bicuruzwa bye”

Ikinyamakuru African News cyatangaje ko nyuma y’aho abo 11 biyemeje kwirinda ibiribwa cyangwa ibinyobwa mu masaha atemewe, imiryango yabo yasabwe gucunga niba biyiriza ubusa koko.

Icyakora Lawal Fagge yakomeje avuga ko abatari Abayisilamu batazafungwa mu gihe bazafatwa babagurisha ibiryo mu gisibo, kuko bo ntibibareba.

Ubusanzwe Abayisilamu biyiriza ubusa kuva izuba rirashe kugeza rirenze mu gisibo cya Ramadhan bakaba baragitangiye ku ya 11 Werurwe kugeza ku ya 9 Mata.