Ikipe yitwa Mouloudia El Bayadh yo mu gihugu cya  Algeria yakoze impanuka mu ijoro ryo ku wa 20 Ukuboza 2023, ubwo yakoraga urugendo igiye gukina umukino wa shampiyona. Amakuru avuga ko iyi kipe ya Mouloudia El Bayadh yari giye gukina umukino wa 11 wa shampiyona y’icyiciro cya mbere muri Algeria 2023-2024 na JS Kabyile, uyu mukino wari kuzakinwa ku wa 22 Ukuboza 2023.

Iyi kipe ikimara gukora impanuka abantu batatu bitabye Imana aba barimo umunyezamu wayo witwa Zakaria Bouziani wari ufite imyaka 27 y’amavuko, umutoza wari wungirije Khaled Moftah ndetse n’uwari utwaye iyi modoka yerekezaga ahitwa Tizi Ouzou gukina na Kabyile. N’ubwo aba batatu bitabye Imana hari abandi bakinnyi batatangajwe imyirondoro bakomeretse ku buryo bukomeye.

Ishyirahamwe ry’Umupira w’Amaguru muri Algeria (FAF), nyuma y’uko habaye iyi mpanuka ryatangaje ko ibikorwa byose bijyanye n’umupira w’amaguru byari biteganyijwe mu mpera z’iki cyumweru byahagaritswe kugeza hatanzwe andi mabwiriza mashya. Ibi bikorwa byiganjemo imikino yose y’umunsi wa 11 wa shampiyona yari kuzakinwa ndetse na tombola y’igikombe cy’igihugu yari kuzaba ku wa 26 Ukuboza 2023, igasubikwa.

Mu mikino icumi imaze gukinwa muri shampiyona ya Algeria 2023-2024, ikipe ya Mouloudia El Bayadh iri ku mwanya wa gatandatu n’amanota 15 ikaba yarashinzwe mu 1939.

uwari umunyezamu w’iyi kipe akaba yitabye Imana muri iyi mpanuka