Ku wa gatandatu, tariki ya 23 Nzeri, Abanyarwanda batuye bakanakorera muri Etiyopiya, bateraniye kuri Ambasade y’u Rwanda i Addis Abeba, mu nama nyunguranabitekerezo yo kungurana ibitekerezo ku iterambere ry’u Rwanda ndetse n’uruhare rw’abaturage mu rugendo rwo kubaka igihugu. Ibi birori kandi byari bigamije guha ikaze Maj. Gen. (Rtd) Charles Karamba, ambasaderi mushya w’u Rwanda muri icyo gihugu.

Karamba yahoze ari intumwa y’u Rwanda mu gihugu cya Tanzaniya. Muri ibyo birori, yashimye umuryango w’abanyarwanda uba muri Etiyopiya ku nkunga n’uruhare bakomeje kugira mu kubaka u Rwanda binyuze mu bikorwa byinshi birimo kwishyurira ubwisungane mu kwivuza abaturage batishoboye, kugira uruhare muri ‘Cana’ igamije gufasha abanyarwanda benshi kugira umuriro w’amashanyarazi, no gufasha abantu bagizweho ingaruka n’ibiza.

Ambasaderi mushya Karamba yabasabye gukomeza gukorana uwo muvuduko no kurwanya bivuye inyuma abaribo bose bashaka kurwanya iterambere ry’u Rwanda.

Umuyobozi w’umuryango w’abanyarwanda muri Etiyopiya, Richard Hakizimana, yashimiye ambasaderi mu izina ry’abaturage kubera uburyo yabakiriye muri Ambasade ndetse n’inkunga ya ambasade ku Banyarwanda batuye muri iki gihugu. Yamwijeje ko umuryango w’Abanyarwanda wiyemeje kudacogora mu guharanira iterambere ry’u Rwanda kandi ugashyira imbere y’ibindi inyungu z’igihugu.

Abanyarwanda batuye muri Etiopiya bakiriye kandi baha ikaze ambasaderi mushya w'u Rwanda muri icyo gihugu,Maj. Gen. (Rtd) Charles Karamba. pic.twitter.com/s68DsuWl9L

— IMIRASIRE TV (@imirasiretvcom) September 24, 2023