Abasirikare 9 b’ingabo za Repubulika Iharanira Demokarasi ya Congo mu ntara ya Ituri barimo umuyobozi w’akarere ka 32 ka gisirikare n’umuyobozi ushinzwe ibikoresho mu rwego rw’ibikorwa bya FARDC, bafunzwe bakurikiranyweho kunyereza umutungo w’igihugu no kugurisha impuzankano za gisirikare imitwe yitwaje intwaro.

Ubushinjacyaha Bukuru mu Rukiko rwa Gisirikare bwatangaje ko bukomeje iperereza ry’ubucamanza kuri aba basirikare icyenda ba FARDC bashinjwa gukorana n’iyi mitwe yitwaje intwaro mu ntara ya Ituri.

Ubutabera bwa gisirikare burabakurikirana nyuma y’uko kandi bagaragaweho gukoresha impapuro mpimbano, bagaragaza ko zavuye ku buyobozi bwo hejuru nyamara ataribyo. Bamwe mu basirikare baregwa bafungiwe muri Bunia.

Umuvugizi w’ingabo muri Ituri, Lieutenant Jules Ngongo, yatangaje ko iki gikorwa cy’amategeko kirega abasirikari bakuru, kiri mu rwego rwo kubungabunga indangagaciro za FARDC. anavuga ko ubutabera bwa gisirikare bukomeje iperereza hagamijwe gutahura abantu base bashobora kuba bari muri aka gakundi bataramenyekana.