Urwego rw’ubugenzacyaha RIB bafatanije na polisi baguye gitumo abarimu bane barimo n’umuyobozi ushinzwe imyitwarire mu kigo barimo gukuriramo inda umunyeshuri bigisha mu kigo cya ‘Saint Trinite Nyanza’. Ibi byabereye mu karere ka Nyanza, Umurenge wa Kigoma kuwa 12 Nyakanga 2023 mu masaha yo ku mugoroba.

Abatawe muri yombi bafatiwe mu nzu y’umwe muri bo, ari naho bivugwa ko uwo munyeshuri w’imyaka 21 yari ari. Umuvugizi w’urwego rw’ubugenzacyaha RIB, Murangira B. Thierry yavuze ko ‘bikekwa ko iyo nda uwo mwana w’umukobwa yayitewe n’umwe muri abo batawe muri yombi.”

Uwo munyeshuri kandi yafashwe amaze kunywa imiti ikuramo inda. Abatawe muri yombi ni Mugabo w’imyaka 34 y’amavuko akaba ari nawe ushinzwe imyitwarire mu kigo, Sibomana w’imyaka 29 y’amavuko, Aduhire w’imyaka 20 y’amavuko na Mugisha w’imyaka 24 y’amavuko.

Uwo munyeshuri bikekwa ko yasambanyijwe n’umwe muri abo batawe muri yombi yajyanwe kwa muganga kugira ngo yitabweho, mu gihe abatawe muri yombi bafungiye kuri sitasiyo ya Ruhango mu gihe iperereza rigikomeje. RIB irashimira abaturage batanga amakuru kugira ngo ahari kubera ibyaha hamenyekane, ni urugero rwiza rwo gukumira no kurwanya ibyaha.