Ku wa 12 Ugushyingo 2024, hasohotse Iteka rishya rya Minisitiri w’Intebe rishyiraho Sitati yihariye igenga abakozi b’amashuri y’uburezi bw’ibanze. Mu ngingo nshya z’iri teka harimo gukaza ingamba zigamije kuzamura ubumenyi bw’icyongereza mu barimu, ndetse no kongera ireme ry’uburezi mu gihugu hose.

Ingingo ya 10 ivuga ko umwarimu wese agomba gukora ikizamini cy’icyongereza nk’ururimi rwigishwamo mu Rwanda. Ikindi kandi, kugira ngo umwalimu azamurwe mu ntera, agomba kuba afite impamyabumenyi mu burezi, uruhushya rwo kwigisha rutangwa na Minisiteri y’Uburezi, ndetse akanatsinda isuzumabumenyi ry’icyongereza rikorerwa buri myaka itatu.

Umwalimu utsindwa inshuro ebyiri zikurikiranya mu masuzuma y’icyongereza ateganywa n’iteka, azajya yirukanwa. Ibi bigamije kugenzura no kuzamura urwego rw’abarimu mu rugendo rwo kongera ireme ry’uburezi mu gihugu.

Impamvu z’izi ngamba

Nk’uko Minisitiri w’Uburezi, Nsengimana Joseph, yabitangaje, abana benshi batsindwa amasomo ya siyansi kubera ubumenyi buke bw’icyongereza, cyane ko ari rwo rurimi rwigishwamo. Yagize ati:

“Ntushobora gutanga icyo udafite. Ni ngombwa ko abarimu bazamura urwego rwabo mu cyongereza kugira ngo bazamure ireme ry’uburezi.”

Raporo ya Banki y’Isi yo mu 2018 yagaragaje ko 38% gusa by’abarimu bigisha mu mashuri abanza bari bafite ubumenyi buhagije mu cyongereza. Minisiteri y’Uburezi nayo iherutse gutangaza ko 4% gusa by’abarimu basanzwe bigisha bafite ubumenyi buri hagati cyangwa hejuru mu cyongereza.

Imibare yo mu 2021 yerekana ko abanyeshuri bo mu mwaka wa gatatu w’amashuri abanza batsinze imibare ku kigero cya 69.94%, ariko mu 2023 icyo kigero cyagabanyutse kigera kuri 55.6%. Abana bafite ubumenyi bw’ibanze mu cyongereza bageze kuri 37.5% mu 2023 bavuye ku 10% mu 2021.

Hari amashuri amwe n’amwe agaragaza ubushake bwo gukoresha icyongereza nk’ururimi rwo kwigishamo, ariko muri rusange byakomeje kuba ikibazo gikomeye. Abana biga mu myaka ya mbere y’amashuri abanza batsindwa amasuzuma kubera ko batabisobanukirwa neza mu rurimi rw’icyongereza.

Icyerekezo cy’Uburezi

Mu rwego rwo gukemura ibi bibazo, abarimu 12,726 batize uburezi bo mu mashuri y’inshuke n’abanza barimo guhugurwa kugira ngo bongere ubumenyi bwabo. Minisitiri Nsengimana ashimangira ko nta mwalimu ukwiye gukomeza kwitwaza ko yize mu gifaransa, kuko impinduka zashyizweho zigamije kwihutisha gahunda y’uburezi bufite ireme.

“Imyaka ishize ubu abatangiye kujya mu mirimo y’ubwarimu bize mu cyongereza,” Minisitiri Nsengimana yabisobanuye.

Mu 2023, imibare yerekanye ko abarimu n’abandi bakozi bo mu bigo by’amashuri bari 138,038, barimo abagabo 51% n’abagore 49%.

Icyo ibi bivuze ku burezi bw’ejo hazaza

Iri teka rishya riratanga icyerekezo gishya mu burezi mu Rwanda, aho intego ari ukuzamura urwego rw’abarimu no guteza imbere ireme ry’uburezi. Nubwo hari imbogamizi mu ishyirwa mu bikorwa ry’aya mabwiriza, ingamba zihari zigaragaza ubushake bwo guhindura amateka y’uburezi mu Rwanda.