Fabrice Nahimana Raporo yasohowe n’Ikigo INPACT kuri uyu wa Gatatu ushize ivuga ko kuva mu 2023 kugeza hagati mu 2025 u Burusiya bwinjije mu gisirikare cyabwo abarwanyi 1,417 bava mu bihugu 35 bya Afurika.
Iki kigo kivuga ko cyabonye amazina yabo, imyaka yabo, ibihugu baturutsemo, nimero za gisirikare bahawe n’igihe basinyiye amasezerano yo kwinjira mu gisirikare cy’u Burusiya.
INPACT ivuga ko yagenzuye ikabona 316 muri bariya bapfiriye ku rugamba, ikabona imyaka yabo, n’igihe bapfiriye, n’umutwe w’ingabo barimo mu gisirikare cy’u Burusiya.
Iyi raporo ivuga ko muri abo barwanyi baguye ku rugamba abava muri Cameroun ari bo benshi 94, mu gihe batandatu 6 muri abo bapfuye bava mu Burundi.
Muri abo Barundi, umukuru yari afite imyaka 41 naho umuto yari afite imyaka 26.
Inkuru dukesha BBC ivuga ko mu bihugu byavuyemo bariya barwanyi muri kiriya gihe (2023 – hagati mu 2025), harimo ibyo mu karere, urutonde rwa INPACT rwerekana ko;
- Muri Kenya havuye 45
- Burundi – 19
- Tanzania – 9
- Uganda – 7
- Rwanda – 1
Raporo yerekana ko abarwanyi barenga 1,400 baturutse mu bihugu bigera kuri 35 bya Afurika biyandikishije kurwanira u Burusiya muri Ukraine kuva mu 2023 kandi abagera kuri 316 muri bo bamaze gupfa.
