Umuvugizi w’Ingabo z’u Rwanda, Brig Gen Ronald Rwivanga, yatangaje ko inzego z’umutekano zakiriye abasirikare ba Repubulika Iharanira Demokarasi ya Congo (FARDC) hamwe n’abarwanyi b’ihuriro rya Wazalendo, bose hamwe barenga 120. Aba basirikare n’abarwanyi baje banamanitse amaboko nyuma yo guhunga imirwano ikaze yatewe no gufatwa kwa Goma n’umutwe wa M23 mu rukerera rwo ku wa 27 Mutarama 2025.

Mu kiganiro n’ibiro ntaramakuru by’Abafaransa, AFP, Brig Gen Rwivanga yavuze ati: “Abasirikare barenga 120 ba FARDC n’abarwanyi ba Wazalendo baje muri iki gitondo, tubambura intwaro nk’uko twabigenje no ku bandi mu myaka yashize.”

Aba basirikare na Wazalendo bakiriwe ku mupaka w’u Rwanda na Repubulika Iharanira Demokarasi ya Congo, mu Karere ka Rubavu gahana imbibi n’umujyi wa Goma. Leta y’u Rwanda yateguye aho bacumbikirwa mu buryo bwihutirwa kugira ngo babone ubuzima bw’ibanze.

Mu gihe aba binjiraga mu Rwanda, imirwano yari ikomeje mu bice bitandukanye bya Goma hagati y’abarwanyi ba M23 n’abasirikare banze kurambika intwaro.

Brig Gen Rwivanga yasobanuye ko hari abasirikare ba FARDC, abarwanyi ba Wazalendo, ndetse na FDLR barashe amakompora mu karere ka Rubavu. Bimwe mu makompora yafashwe n’ubwirinzi bwo mu kirere, ariko andi yateje akaga gakomeye, yica abaturage batanu ndetse akomeretsa abandi 35.

Iyi mirwano ikaze yongeye guteza impungenge mu karere, aho abaturage b’i Goma n’abaturiye umupaka wa Rubavu bugarijwe n’ingaruka z’intambara ikomeje gufata indi ntera.