Fabos Fali 
Ihuriro ry’abasirikare bo muri Afurika y’Epfo ryatangaje ko abasirikare batatu b’iki gihugu bapfiriye mu mirwano bari bahanganyemo n’umutwe witwaje intwaro wa M23 mu Burasirazuba bwa Repubulika Iharanira Demokarasi ya Congo.
Iri huriro rizwi nka SANDU kuri uyu wa 25 Mutarama 2025 ryasobanuye ko aba basirikare bishwe tariki ya 23 Mutarama, hakomereka bagenzi babo 14.
Ryagize riti “Igitambo cyabo n’ibikomere abandi basirikare 14 ba Afurika y’Epfo bagiriye mu mirwano iri kubera muri iki gice, bitwibutsa ibyago abari kubungabunga amahoro n’umutekano bafite. Abenshi muri aba basirikare b’intwari ni abanyamuryango ba SANDU, bakoreye igihugu cyabo batizigama.”
Abasirikare ba Afurika y’Epfo bari mu ngabo z’Umuryango wa Afurika y’Amajyepfo (SAMIDRC) boherejwe mu Ntara ya Kivu y’Amajyaruguru kugira ngo bifatanye n’iza RDC kurwanya M23.
Ingabo ziri mu butumwa bw’amahoro bw’Umuryango w’Abibumbye muri RDC (MONUSCO) na zo ziri kwifatanya n’iza RDC muri iyi ntambara, kuva tariki ya 23 Mutarama, ubwo abarwanyi ba M23 binjiraga mu mujyi wa Sake.
Ubuyobozi bwa MONUSCO kuri uyu wa 24 Mutarama bwatangaje ko mu masaha 48 yashize, abasirikare icyenda bari muri ubu butumwa bakomerekeye muri iyi ntambara, bane bakomeretse ku munsi wa mbere na batanu bakomeretse ku wakurikiyeho.
M23 yaburiye SAMIDRC n’Ingabo za MONUSCO, ibamenyesha ko izakoresha uburenganzira bwose ifite bwo kwirwanaho mu guhangana na bo. Ni ubutumwa yatanze, iteguza gufata Goma, nyuma ya Sake.
Fabos Fali 
