Polisi yo muri Lodwar town, ahitwa Turkana county mu gihugu cya Kenya, yataye muri yombi abasore batatu bigaragambyaga mu myigaragambyo ya Saba saba day yateguwe n’umuyobozi w’ishyaka rihanganye n’iriri ku butegetsi, Raila Odinga muri icyo gihugu.

Nk’uko tubikesha ikinyamakuru citizen.digital cyo muri Kenya, abasore batatu bigaragambiraga mu mihanda ya Lodwar batwaye ibyapa mu ntoki basabaga leta kugabanya igiciro cy’ibiribwa. Abapolisi bari mu kazi biteguye guhana abakora inama zitemewe bahise babata muri yombi babatwara mu modoka ya land cruiser.

Aba basore batatu kuri ubu bafungiye kuri sitasiyo ya polisi ya Lodwar. Abashinzwe uburenganzira bw’ikiremwamuntu muri Lodwar bayobowe na Lokopirr Joseph ndetse na Ikal Angeley bari gushyira igitutu kuri komanda wa polisi yo muri Turkana county ngo afungure aba basore batatu bigaragambyaga igitaraganya.