Mu ijoro ryo kuwa 29 Nzeri 2023 mu kagali ka Rusera mu murenge wa Kabarondo mu karere ka Kayonza, abantu 20 bahoze mu itorero ry’Abadivantisti b’Umunsi wa Karindwi batawe muri yombi nyuma yo gusanga basengera mu rugo rw’umwe muri bo. Bimwe mu byo abo batawe muri yombi batemera harimo no kuba umugore n’umugabo badasengana batagomba kubana.

Amakuru aravuga ko aba baturage batawe muri yombi batubahiriza gahunda za Leta kubera imyemerere bafite irimo kudatanga ubwisungane mu kwivuza, kudakora umuganda, gukura abana mu ishuri n’ibindi byinshi. Ni abantu bitandukanije n’itorero ry’Abadivantisiti basigara basengera mu ngo aho bareba urugo rw’umwe muri bo bakajyayo bagasengerayo.

Nk’uko byatangajwe n’umunyamabanga nshingwabikorwa w’umurenge wa Kabarondo, Jean Paul Kagabo, avuga ko ari abantu biyomoye kuri gahunda za Leta aho basenya n’ingo z’abandi, bavuga ko umugore n’umugabo badasengera hamwe batabana, byatumye hari ingo ebyiri zitakibana kubera iyo mpamvu.

Gitifu Kagabo yavuze aba bantu babajyanye kuri polisi bashyikirizwa RIB kugira ngo barebe niba ibyo bakora nta byaha birimo kuko kubaganiriza bisanzwe byarakozwe ariko banga kuva ku izima. Uyu muyobozi yasabye abasenga kwirinda imyumvire mibi n’ubujiji.