Mu matora yo gusimbura abayobozi bo mu nzego z’ibanze bagiye bava mu kazi ku mpamvu zitandukanye, I Rulindo hakenewe uzasimbura uwitwa Mukabagire Scholatique uherutse gusezera agiye muri gahunda z’amasomo.

Guverineri w’Intara y’Amajyaruguru, Mugabowagahunde yavuze ko kugeza ubu nta n’umwe wari watanga kandidatire ye. Ubwo yaganiraga n’abanyamakuru kuri uyu wa 9 Ugushyingo 2023, yagize ati “Rulindo bakeneye Umujyanama umwe, ku mugoroba narebye mu ikoranabuhanga, nta muntu urashyiramo kandidatire, muri gutinya iki? Ushobora kuba uba I Musanze, cyangwa uba hehe ariko ukajya gutanga umusanzu.”

Ni nyuma y’uko hashize igihe komisiyo y’igihugu y’Amatora NEC iri guhamagarira abantu gutanga kandidatire zabo kugira ngo haboneke usimbura uyu Mujyanama nk’uko biri gukorwa n’ahandi hirya no hino mu gihugu.

Guverineri Mugabowagahunde yakomeje avuga ko Abajyanama ari nabo bazavamo abayobozi, asaba urubyiruko gutinyuka kuko kumva ko akarere kabura umujyanama ari ibintu bidasobanutse. Yavuze ko imiryango ifunguye ku muntu wese uvuka I Rulindo yaba ahatuye cyangwa atahatuye, ariko afite umusanzu yumva yatanga muri Njyanama y’akarere.

Mukabagire Scholatique yari umwe mu bagore batanu bangana na 30% y’Abajyanama bose nk’uko itegeko ribiteganya. Yari yatowe mu matora yo mu Ugushyingo 2021.