Uwari umunyamabanga mukuru w’ishyirahamwe ry’umupira w’amaguru mu Rwanda, FERWAFA Muhire Henry ndetse na Iraguha David wari ushinzwe imari beguye nyuma y’uko hari hashize amasaha 26 gusa perezida wa FERWAFA na we yeguye. Ni nyuma y’uko Nizeyimana Mugabo Olivier yari yeguye avuga ko ari ku mpamvu ze bwite zimukomereye nk’uko yabinyujije mu ibaruwa y’ubwegure.

Nubwo nta baruwa yegura ya Muhire yari yajya hanze, ariko amakuru yizewe ni uko yamaze gusezera ku nshingano zo kuba umunyamabanga wa FERWAFA. Yeguriye rimwe kandi na David Iraguha wari ushinzwe imari akaba yaranabayeho umunyamabanga w’umusigire.

Muhire yatangajwe nk’umunyamabanga mukuru wa FERWAFA kuwa 6 mutarama 2022 ubwo yari asimbuye Uwayezu Francois Regis wari uwumazeho imyaka itatu na we weguye kuwa 12 nzeri 2021 umwanya we awusigira uyu Iraguha David nk’umunyamabanga w’umusigire wa FERWAFA.