Fabos Fali 
Guverinoma y’u Bwongereza yagaragaje ko abimukira batemewe n’amategeko binjiye muri iki gihugu bakoresheje ubwato buto mu 2024, ari 36.816.
Iyi mibare yatangajwe n’ibiro bishinzwe umutekano w’imbere, igaragaza ko aba bimukira biyongereyeho 25% ugereranyije na 29.437 binjiye mu 2023.
Mu mwaka wa 2024, abimukira ba nyuma binjiye mu Bwongereza ni 291, binjiye tariki ya 29 Ukuboza 2024 baturutse mu Bufaransa. Uwo munsi batwawe n’ubwato buto butandatu.
Ntabwo ibi biro byatangaje umubare w’abapfuye barohamye, gusa urwego rw’u Bufaransa rushinzwe umutekano wo mu mazi rwo rwemeza ko 53 bapfuye bajya mu Bwongereza.
Ubwiyongere bw’aba bimukira bugaragaza ko ingamba Guverinoma iyobowe n’ishyaka ry’Abakozi (Labour) yafashe zo kubakumira nta musaruro zatanze. Izo zirimo kongerera imbaraga urwego rurinda umupaka no gushyiraho ibikoresho by’ikoranabuhanga rigezweho.
Iyi Guverinoma yashyizeho izi ngamba ubwo yanengaga gahunda yo kohereza abimukira i Kigali, yashingiraga ku masezerano Guverinoma y’Aba-Conservateurs yari yaragiranye n’u Rwanda muri Mata 2022, yavuguruwe mu Ukuboza 2023.
Gahunda yo kohereza abimukira mu Rwanda yahagaritswe na Minisitiri w’Intebe w’u Bwongereza, Keir Starmer, muri Nyakanga 2024. Kuva ubwo, umubare w’abimukira binjira mu gihugu cyabo waratumbagiye.
Fabos Fali 
