Fabrice Nahimana Ihuriro Alliance Fleuve Congo (AFC/M23) ryatangaje ko abantu 10 bo mu muryango umwe, barimo abagore n’abana, bishwe mu buryo bw’agashinyaguro mu ijoro ryo ku itariki ya 4 rishyira iya 5 Mata 2025, mu gace ka Kanzana, muri Nyiragongo, Intara ya Kivu y’Amajyaruguru. Iri huriro rirashinja Leta ya Kinshasa kuba inyuma y’ubu bwicanyi, rivuga ko bwakozwe mu buryo bwo guhungabanya amahoro no guharabika AFC/M23.
AFC/M23 ivuga ko ubu bwicanyi bwabaye nyuma y’uko yari yashyizeho politiki igamije gufasha abaturage, harimo koroshya ingendo z’abantu n’ibicuruzwa mu bice yafashe, ndetse no gukuraho bariyeri zabangamiraga ubwisanzure bwo mumihanda.
Mu itangazo ryashyizweho umukono na Lawrence Kanyuka, umuvugizi w’ ihuriro AFC, rigira riti: “Ibi bikorwa bigayitse byakozwe mu mugambi wo guharabika izina rya AFC/M23 ”
AFC/M23 iraburira Leta ya Kinshasa n’ingabo zayo, ibashinja kugira uruhare muri ibi bikorwa by’iterabwoba, ndetse inavuga ko yafashe ingamba zo kubihagarika no guhana ababigizemo uruhare.
Iri huriro kandi rinenga izi gahunda kuko zibangamiye ibikorwa byo gushaka amahoro arambye muri Repubulika Iharanira Demokarasi ya Congo (RDC), rinavuga ko zinyuranyije n’agahenge ryari ryatangaje ku giti cyaryo.
AFC/M23 yemeza ko izakomeza kurinda abaturage b’inzirakarengane no gukorana n’impande zose kugira ngo amahoro arambye agerweho muri RDC.
Kugeza ubu, nta gisubizo kiratangazwa na Leta ya Kinshasa kuri ibi birego.
