Fabrice Nahimana Umutwe wa AFC/M23 urwanya ubutegetsi bwa Repubulika Iharanira Demokarasi ya Congo, washimangiye ko utazigera na rimwe uva mu bice wabohoye.
Byatangajwe na Lawrence Kanyuka uvugira uyu mutwe, mu itangazo yasohoye kuri uyu wa Mbere tariki ya 26 Mutarama 2026. Yasubizaga ku itangazo ry’ingabo za Repubulika Iharanira Demokarasi ya Congo ryo ku wa 23 Mutarama zashinje AFC/M23 guteza umutekano muke mu duce igenzura, “by’umwihariko mu mijyi ya Goma na Bukavu yo mu ntara za Kivu y’Amajyaruguru na Kivu y’Amajyepfo, ndetse ikaba iri kugerageza kubikora mu mujyi wa Uvira”.
Kanyuka yashimangiye ko bitandukanye n’ibivugwa, AFC/M23 itazigera na rimwe iva mu bice yafashe.
Yagize ati: “AFC/M23 ntabwo izigera iva mu gace na kamwe yabohoye. Uduce turi mu buyobozi bwayo turi mu mahoro y’ukuri kandi arambye. Abaturage bahakorera imirimo yabo amasaha 24 kuri 24, serivisi zigenewe abaturage zasubijweho, ubukungu bwaho bwifashe neza ndetse ibiciro by’ibiribwa biragabanuka kubera umusaruro mwinshi w’ibikomoka ku buhinzi.”
AFC/M23 kandi yagaragaje ko izindi mpamvu zishobora gutuma itava mu bice igenzura, ari uko amashuri akora bisanzwe, amazi meza n’amashanyarazi bihoraho; ikindi imibereho y’abaturage ikaba irushaho kuba myiza.
AFC/M23 yashimangiye ko itazigera ireka ngo “umuntu uwo ari we wese harimo na leta ya Kinshasa ahungabanye amahoro n’umutekano mu bice byabohowe.”
Yashimangiye kandi umuhate wayo wo kurinda no gufasha abaturage b’abasivile aho hose bahanganye no gutotezwa, kugirirwa nabi cyangwa gukorerwa iyicarubozo n’ubutegetsi bwa Kinshasa buyoborwa n’abantu b’abanyagitugu.
