Fabos Fali 
Minisitiri w’Ububanyi n’Amahanga n’Ubutwererane wa Afurika y’Epfo, Ronald Lamola yatangaje ko mu ntambara ingabo z’igihugu cye zirwana na M23 mu Burasirazuba bwa RDC, bakorana n’ingabo za Leta n’imitwe yitwaje intwaro ihari kugira ngo intego yabajyanye ibashe kugerwaho.
Yabitangarije mu kiganiro ‘Face the Nation’ cya SABC kuri uyu wa 30 Mutarama 2025, cyagarukaga ku mwuka mubi wongeye kubyuka hagati y’u Rwanda na Afurika y’Epfo, kubera imvugo za Perezida Cyril Ramaphosa wise Ingabo z’u Rwanda inyeshyamba.
Lamola yavuze ko Rwanda Defense Force (RDF) ari Ingabo z’u Rwanda, bityo atazi impamvu Umukuru w’Igihugu cye yazise inyeshyamba.
Yahamije ko Ingabo za Afurika y’Epfo zatumiwe na Repubulika Iharanira Demokarasi ya Congo, zijya mu bikorwa byo kugarura amahoro, nyamara zagezeyo zijya ku rugamba rwo guhangana M23, umutwe w’abenegihugu barwanira uburenganzira bwabo bimwe na Leta ya RDC.
U Rwanda rushinja SANDF gukorana n’umutwe w’iterabwoba wa FDLR ufite umugambi wo guhirika ubutegetsi bwarwo, ndetse mu minsi mike ishize ihuriro ririmo izo mpande zombi ryarashe mu Mujyi wa Rubavu hapfa abantu icyenda abandi barenga 30 barakomereka.
Minisitiri Lamola abajijwe niba koko ku rugamba abasirikare ba Afurika y’Epfo barwana hamwe n’abarwanyi ba FDLR, yirinze kubyemeza ariko ahamya ko bitewe n’amayeri y’urugamba barimo, bakorana na buri mutwe uhari ngo bagere ku ntego yabajyanyeyo.
Ati “Bitewe n’ibiri kuba ku rugamba, na none bitewe n’amayeri y’urugamba hari igihe usanga ugomba gukorana n’impande nyinshi ziri ku rugamba kugira ngo ibikorwa byawe bishobore kugenda neza, ibyo ni byo byagiye bibaho mu bihe byashize ndetse bikomeza kubaho mu bihe bitandukanye.”
Ingabo za Afurika y’Epfo zagiye mu Burasirazuba bwa Congo mu butumwa bwa SADC, nyuma y’uko Perezida Tshisekedi yirukanye izari zihari z’Umuryango wa Afurika y’Iburasirazuba kuko zari zanze kwifatanya na FARDC ndetse na FDLR ku rugamba rwo kurwanya M23.
Afurika y’Epfo, ku ruhande rumwe ivuga ko ikibazo cy’intambara mu Burasirazuba bwa Congo kizakemurwa burundu n’ibiganiro byaba hagati y’impande zose harimo na RDC igomba kuganira na M23. Ku rundi ruhande iki gihugu gikomeza gutsimbarara ku kugumisha ingabo zacyo mu karere no kurwanya umutwe wa M23.
Minisitiri w’Ububanyi n’Amahanga n’Ubutwererane w’u Rwanda, Olivier Nduhungirehe, yabwiye SABC ko nubwo ibihugu byombi bidahana imbibi ariko ingabo za Afurika y’Epfo nizifatanya na FDLR mu kugaba ibitero ku Rwanda, na rwo rwiteguye guhangana na zo.
Fabos Fali 
