Ignace DUKUZIMANA Kuri uyu wa 24 Ugushyingo 2023, Urukiko Rwisumbuye rwa Gicumbi rwategetse ko abayobozi bo mu karere ka Rulindo n’abigeze kuhayobora, bakurikiranweho ibyaha byo kunyereza umutungo, ubufatanyacyaha, gukoresha no guhindura inyandiko bafungwa by’agateganyo iminsi 30 kubera uburemere bw’ibyaha bakurikiranweho.
Abo barimo Umunyamabanga Nshingwabikorwa w’Akarere ka Rulindo, Kanyangira Ignace, Umunyamabanga Nshingwabikorwa w’Akarere ka Muhanga, Bizumuremyi Al Bashir, Umuyobozi wa One Stop Center i Gicumbi, Felicien Niyoniringiye, Umukozi ushinzwe Imari n’Ubutegetsi mu karere ka Rulindo, Delice Mugisha, uwari umucungamutungo w’akarere ka Rulindo, Celestin Kurujyibwami na Francoise Irambona.
Muhanguzi Gofrey wari Umuyobozi w’Imirimo rusange mu karere ka Huye, Mugisha Denis na Bavugirije Juvenal, Urukiko rwategetse ko bakurikiranwa bari hanze, bakajya barwitaba uko rubahamagaje.
Aba bayobozi batawe muri yombi kuwa 3 Ugushyingo 2023, bavugwaho kuba baranyereje amafaranga y’ingurane yagombaga guhabwa abaturage bangirijwe imitungo yabo mu ikorwa ry’umuhanda.
