Kuwa 21 Kanama 2023 nibwo Urwego rw’Ubugenzacyaha RIB rwavuze ko rwataye muri yombi Munyankindi Benoît wari umunyamabanga wa FERWACY akurikiranweho icyaha cyo gufata icyemezo gishingiye ku itonesha, ubushuti, ikimenyane cyangwa icyenewabo.

Hari hashize iminsi mike Munyankindi asabiye umugore we Visa yo kujya muri Ecosse, akamushyira kuri lisiti y’abagomba guherekeza ikipe y’igihugu yari igiye gusiganwa mu gihe nta nshingano yari afite muri iyo delegasiyo. Munyankindi yaje gukatirwa igifungo cy’iminsi 30 y’agateganyo ajyanwa mu igororero rya Mageragere, gusa yaje kujuririra icyemezo cy’urukiko.

Kuri uyu wa 30 Ukwakira 2023 nibwo hasomwe icyemezo cy’urukiko ku bujurire bwa Munyankindi, nyuma y’isuzumwa ryakozwe, Urukiko rwisumbuye rwa Nyarugenge rwategetse ko arekurwa by’agateganyo agakurikiranwa ari hanze, nyuma y’uko Urukiko rusanze nta mpamvu zikomeye Ubushinjacyaha bwatanze zituma akekwaho icyaha.

Munyankindi asanzwe ari umuyobozi wa Benediction Excel Energy Team, imwe mu makipe asiganwa ku magare mu Rwanda.