Dukuzimana Ignace Urwego rw’igihugu rw’ubugenzacyaha RIB rwatangaje ko rwataye muri yombi umugabo witwa Musonera Theogene wo mu karere ka Kayonza ukekwaho kwica umugore we n’abana batatu akoresheje umuhoro agahita atoroka. Ni ubwicanyi bwamenyekanye tariki 15 Kamena 2023.
Abaturanyi babonye nta muntu usohoka mu rugo rw’uwo muryango, mu kugenzura baza kumenya ko bishwe. Mu makuru yamenyekanye aturuka mu baturanyi ni uko batabashaga kwemeza icyatumye umugabo yica umuryango we kuko wari umuryango ubanye neza.
Murangira B. Thierry, umuvugizi wa RIB yavuze ko ku bufatanye n’abaturage, Musonera Theogene yafashwe kuwa 23 Kamena 2023 nyuma y’iminsi yihishahisha iperereza rikaba rigikomeje. Amakuru avuga ko nyuma yo kwica umuryango we, Musonera yagumye mu karere ka Kayonza ari naho yafatiwe, inzara ikaba ariyo yatumye ajya ahagaragara.
RIB yemeje ko nyuma yo gufatwa kwa Musonera, igiye kumubaza ibibazo kubyaha akurikiranweho, nyuma ishyikirize dosiye ye ubushinjacyaha nab wo buzaregere urukiko. Musonera yishe abana be batatu, umukuru w’imyaka 12 witwa Igiraneza Gentille, Manzi Fabrice w’imyaka 10 n’umuto witwa Uwihirwe Kevin w’imyaka 2 n’umugore we babanaga Mukawizeye Donatha w’imyaka 32.
SRC: Igihe
Dukuzimana Ignace 