Mu gihe u Rwanda n’Isi yose byinjiye mu minsi 100 yo kwibuka ku nshuro ya 30 Jenoside yakorewe Abatutsi mu 1994, Perezida Paul Kagame yavuze ko hari amasomo “atatu akomeye” u Rwanda ruvana muri jenoside yakorewe Abatutsi rwaciyemo, n’uburyo bwo gukumira ko yakongera kuba ukundi.

Isomo rya mbere arishingira ku kuba Abanyarwanda ubwabo ari bo avuga ko bahagaritse jenoside nyuma yo gutereranwa n’amahanga. Ati“Icya mbere, twebwe gusa, Abanyarwanda n’Abanyafurika, ni twe dushobora guha agaciro gakwiriye ubuzima bwacu…”

“Isomo rya kabiri, kudategereza gutabarwa cyangwa gusaba uruhushya rwo gukora igikwiye ngo urengere abantu…

“Irya gatatu, kurwanya iteka politike y’ivanguramoko. Jenoside ni ivanguramoko ry’uburyo bubi bukabije… kandi kuko impamvu zayo ziba ari iza politike, n’umuti wayo ugomba kuba uwa politike. Kubera iyo mpamvu, politike yacu ntishingiye ku moko cyangwa idini, kandi ntizongera kumera ityo.”

Perezida Kagame yakomeje avuga ko aho u Rwanda rugeze ari ku bw’ubumwe bw’Abanyarwanda

Perezida Kagame yavuze ko u Rwanda rugeze aho rugeze ubu “kuko twahisemo kuzura (kuzuka) igihugu cyacu dushingiye ku bumwe, no kugira igihugu cyunze ubumwe, kandi tukabaho dutyo”. Ndetse ngo “icy’ingenzi cyane twahisemo ni ugutekereza tukarenga akaga kabaye tukaba abantu bafite ahazaza”.

Ubushakashatsi buheruka (2021) bw’ikigo cya leta y’u Rwanda buvuga ko igipimo cy’ubwiyunge kiri kuri 94%, abatavuga rumwe n’ubutegetsi n’imiryango imwe n’imwe bo bavuga ko Abanyarwanda batunze ubumwe nk’uko leta ibivuga.

Victoire Ingabire ukuriye ishyaka DALFA-Umurinzi, ritaremerwa na leta, kuri buriya bushakashatsi bwo mu 2021 yavuze ko imibare butangaza we abona “ari ugukabya” kuko abona hari benshi bakireberwa n’abibona mu ndorerwamo z’amoko yabo.