Nyampinga w’ Urwanda wa 1993 Jeanne Nubuhoro, ni umukobwa wa Jean Munyankindi na Mediatrice Nyiramadadari mwene Murekezi wa Ndayishimiye ba Byabagabo ba Rugenzi rwa Mutaga rwa Nyiramakende wa Mugunga wa Kibogo cya Ndahiro Cyamatare w’I bwami bw’u Rwanda.  Uko tariki 11 mata 1994 umunsi wa gatanu wa Jenoside yakorewe abatutsi mu 1994 wiriwe

Mu mwaka wa 1992 Nubuhoro na nyina bahungiye mu gihugu cy’u Burundi kubera umutekano wari muke mu Rwanda, nyuma bagezeyo Jeanne wigaga mu ishuri rya G.S.N.D.B.C Byumba yiyamamaje mu bakobwa bahataniye ikamba rya nyampinga w’u Burundi aza mu bambere kubera ko yabaye igisonga cya Nyampinga w’u Burundi.

Uyu mukobwa Nubuhoro ni we mukobwa w’umunyarwandakazi wenyine watowe muri ayo matora ya nyampinga w’u Burundi yabaye mu ibanga rikomeye akabera muri hotel Merdien. Mu mwaka wa 1994, miss Nubuhoro yiciwe I Ndera ahitwa Caraes aho we n’umuryango we bari bahungiye. Uyu mukobwa yishwe hashize iminsi itandatu ingabo za MINUAR zarindaga I Ndera zihavuye, impunzi z’abatutsi zahahungiye zisanga mu maboko y’interahamwe.

Kuva kuwa 11 mata 1994 abatutsi bari bahungiye I Ndera ahitwa Caraes bagerageje kwirwanaho nyuma y’uko MINUAR ibatereranye kugeza kuwa 17 mata 1994 aho interahamwe zabaganjije. Interahamwe zahise ziza muri Caraes aho impunzi z’abatutsi ziri zihita zimenya miss Nubuhoro Jeanne ziramusohora, zimwica urupfu rw’agashinyaguro zimwicana n’umubyeyi we Nyiramadadari Mediatrice hamwe n’abavandimwe babiri Pauline Munyankindi na Fidele Munyankindi. Src: Umuryango