Fabrice Nahimana Muri Leta Zunze Ubumwe za Amerika indege ya gisivile ya sosiyete ya SkyWest Airlines, habuze gato ngo igongane n’indege ya gisirikare yo mu bwoko bwa B-52 Stratofortress.
Ibi byabaye ku wa Gatanu tariki 18 Nyakanga 2025, gusa amakuru yabyo ashyirwa hanze ku wa Kabiri tariki 22 Nyakanga 2025.
Iyi ndege ya SkyWest yavaga i Minneapolis muri Let aya Minnesota, yerekeza i Minot muri North Dakota. Ubwo yari iri hafi kururuka, yahise itungurwa na B-52 Stratofortress yayisanze mu kirere, nyuma yo guhaguruka ku birindiro bya gisirikare biri aho hafi.
Umupilote w’iyi ndege ya gisivile yavuze ko byasabye ko akata byihuse kugira ngo atagongana n’iyi ya gisirikare.
Ati “Mushobora kuba mwabonye indege yaje idusatira iturutse iburyo, ngendeye ku muvuduko yari ifite ni indege ya gisirikare. Nabonye ko gukata nkayica inyuma aricyo kintu cyiza nkwiriye gukora.”
Uyu mupilote yasabye imbabazi abagenzi bahungabanyijwe n’uku gukata guhutiweho.
Amakuru dukesha ABC avuga ko aya makosa yatewe no kutumvikana neza hagati y’abashinzwe kuyobora indege za gisivile n’iza gisirikare muri aka gace.
