Fabos Fali 
Leta Zunze Ubumwe za Amerika imaze gutanga inkunga y’amafaranga n’intwaro ifite agaciro karenga miliyari 100$, mu gufasha Ukraine guhangana n’u Burusiya mu ntambara imaze imyaka irenga ibiri iri guca ibintu hagati y’impande zombi.
Ibi byatangajwe n’Umunyamabanga wa Leta Zunze Ubumwe za Amerika ushinzwe Ububanyi n’Amahanga, Antony Blinken, wavuze ko Abanyamerika bungukiye muri iyi ntambara nubwo hari benshi bavuze ko iyi ntambara yatwaye akayabo k’amafaranga yari gushorwa mu bindi bikorwa byo guteza imbere ubukungu bwa Amerika.
Blinken yagize ati “Menshi muri ayo mafaranga yashowe hano, mu nganda zacu zikora intwaro, ibyo byatumye Abanyamerika bazikoramo bakomeza kubona imirimo kandi myiza.”
Uyu muyobozi kandi yahishuye ko ibindi bihugu bimaze gushora arenga miliyari 150$ mu gukomeza gufasha Ukraine kwirwanaho, ibyo bikaba byiganjemo ibyo ku Mugabane w’u Burayi.
Donald Trump uherutse gutorerwa kuyobora Amerika yitezweho kugabanya amafaranga igihugu cye gishora muri iyi ntambara, aho yanatanze isezerano ryo guhagarika iyi ntambara mu gihe gito.
Fabos Fali 
