Bimwe mu bihugu biri muri BRICS biherutse gutangiza umugambi wo kwishyurana hakoreshejwe andi mafaranga cyangwa se ubundi buryo, ariko ntibikoreshe idolari.

Uyu mugambi warushijeho kubona ibihugu biwushyigikira nyuma y’uko u Burusiya bufatiwe ibihano by’ubukungu, umutungo wabwo, urimo n’amadolari bwari bwarabikije mu mahanga, ugafatirwa.

Ku rundi ruhande, ibihano bifatwa na Leta Zunze Ubumwe za Amerika bigira uburemere kuko ibihugu biba bikoresha idolari mu bucuruzi mpuzamahanga.

Ibi byose rero bituma ibihugu biri mu muryango wa BRICS bisanga ari ikintu cy’ingenzi mu gukorana ubucuruzi bitifashishije idolari, uretse ko iki ari ikintu kitoroshye.

Perezida Trump yavuze ko ibihugu biri muri uyu mugambi, nubwo bitazapfa kuwugeraho, bishobora no gushyirirwaho umusoro wa 100% ku bicuruzwa byabyo byinjira muri Amerika.

Abinyujije ku rubuga rwa Truth Social, Trump yagize ati “Igitekerezo cy’uko ibihugu biri muri BRICS biri kugerageza guhagarika ikoreshwa ry’idolari natwe tukaba turi aho turebera, ubu birarangiye.”

Yavuze ko ibyo bihugu bigomba guhagarika iyo myitwarire, bitaba ibyo, bigafatirwa ibihano by’ubukungu bikarishye.

Si ubwa mbere Trump avuga ko ibihugu biri muri BRICS bishobora gufatirwa ibihano kuko yari yanabivuzeho mu Ugushyingo 2024.

Yongeyeho ati “Nta mahirwe ahari ko BRICS yahindura idolari mu bucuruzi mpuzamahanga cyangwa se mu bindi, kandi igihugu cyose kizagerageza, kizaba kiri kuramutsa ibihano by’ubukungu ndetse kinasezera kuri Amerika.”