Fabos Fali 
Komite y’Inteko Ishinga Amategeko ya Leta Zunze Ubumwe za Amerika yongeye guha ishingiro imvugo z’uko Covid-19 yakomotse ku mpanuka yo muri laboratwari, aho kuba yaravuye mu nyamaswa n’izindi nkomoko iyo virusi yagiye itazirwa.
Raporo yashyizwe hanze tariki 02 Ukuboza 2024, iyo komite yari ishinzwe kwita kuri Covid-19, yemeza ko iyo virusi yaturutse ku mpanuka y’abari bari mu bushakashatsi kuri yo, virusi icika abari kubukora ijya mu bantu.
Iyo raporo y’amapaji 520 yamaze hafi imyaka ibiri itegurwa. Mu itegurwa ryayo hibanzwe ku bo mu nzego zitandukanye za Amerika ku buryo babonye iyo ndwara, harebwa aho yaturutse, ndetse hasuzumwa n’imbaraga zashyizwe mu bikorwa by’ikingira.
Muri iyo raporo habonywe ko Ikigo cya Amerika gishinzwe ubuzima, NIH cyateye inkunga mu bushakashatsi bwakorewe mu Bushinwa mu kigo cya Wuhan Institute of Virology cyo mu Mujyi wa Wuhan.
Ubwo bushakashatsi bwari ubwo gukora virusi zikomeye hagamijwe kurwanya izatera Isi, bigakekwa ko muri icyo gikorwa ari ho ya mpanuka yabereye, virusi igacika abashakashatsi ikajya mu bantu.
Bihuzwa n’uko abantu ba mbere basanzwemo iyo virusi bari abo mu Mujyi wa Wuhan wo mu Ntara ya Hubei. Icyo gihe hari mu Ukuboza 2019, bigakekwa ko ari ho COVID-19 yakomotse bwa mbere.
Icyo gihe iyo ndwara yahise ikwira Isi yose, abarenga miliyoni zirindwi irabahitana ubukungu bw’ibihugu burazahara, imipaka irafungwa, hashyirwaho za guma mu rugo, mbese ibintu biradogera.
Icyemezo cy’uko Covid-19 yavuye muri laboratwari gihura n’icy’Urwego rw’Ubugenzacyaha rwa Amerika, FBI bwagaragaje mu 2021, ko amakuru rwaboye ari uko iyo virusi yakomotse muri laboratwari.
Mu iperereza iyo komite yakoze yanabajije umuhanga mu bya siyansi wari ushinzwe guha amakuru abantu mu bihe bya mbere bya Covid-19, witwa Anthony Fauci, kuko na we byakekwaga ko yabigizemo uruhare.
Nyuma iyo komite yashinje Anthony Fauci wanagiye mu kiruhuko cy’izabukuru mu 2022 nyuma y’imyaka 54 akora muri NIH, kugira uruhare mu guteza Isi ibyago, binyuze mu kwemeza inkunga y’ubwo bushakashatsi bivugwa ko bwakomotsemo Covid-19.
Uyu mukambwe w’imyaka 83, yanashakiwe uburinzi we n’umuryango we kubera abantu bamubwiye ko bazamwica, bamushinja koreka Isi nkana.
Muri Gicurasi 2024 Anthony Fauci yagaragaje ko abavuga ko Covid-19 yavuye muri laboratwari babeshya.
Ati “Nongere mbisubiremo ndetse nabivuze inshuro nyinshi ko Covid-19 itavuye muri laboratwari. Ni ibihuha by’abantu bidafite aho bishingiye.”
Fabos Fali 
