Kuri uyu wa 23 Ukwakira 2023, ku rukiko rw’ibanze rwa Gasabo nibwo Harerimana Joseph uzwi nka Apotre Yongwe agiye kuburana ku ifungwa n’ifungurwa kuri dosiye akurikiranweho n’Ubushinjacyaha ku cyaha cyo kwihesha ikintu cy’undi hakoreshejwe uburiganya. Yongwe yatawe muri yombi kuwa 1 Ukwakira 2023.

Amakuru avuga ko itabwa muri yombi rya Yongwe rikomoka ku mashusho yigeze gusakara ari imbere y’abayoboke be abasaba gutura kugira ngo abasengere ibibazo byabo bikemuke, ariko bikaba byaranze gukemuka. Icyakora ku rundi ruhande, abakurikira ibiganiro bikorerwa ku mbuga nkoranyambaga bo bavuga ko Yongwe atakabaye ari we wenyine ukurikiranweho iki cyaha kuko hari abapasiteri benshi biseguza umuhamagaro bafite bagatuburira abakristu.

Kuba Yongwe agiye kuburana ku ifungwa n’ifungurwa ry’agateganyo bisobanuye ko aburana atemera icyaha, kuko uwemera icyaha ahita aburana urubanza mu mizi mugihe iyo uburana utemera icyaha ubanza kuburana ku ifungwa n’ifungurwa ry’agateganyo mu minsi 30 kugira ngo Ubushinjacyaha bubanze bukusanyirize hamwe ibimenyetso bifatika.