Fabos Fali 
Ikipe ya APR FC yasinyishije rutahizamu w’Ikipe y’Igihugu ya Burkina Faso, Djibril Ouattara, wavugwaga muri Ittihad Tanger yo muri Maroc, ku masezerano y’imyaka ibiri.
Djibril Ouattara waherukaga gutandukana na JS Kabylie iyoboye Shampiyona ya Algérie, yifuzwaga cyane na Ittihad Tanger ndetse amakuru menshi yavugaga ko iyi kipe yo muri Maroc yamaze kumwegukana.
Amakuru ahari ni uko APR FC yasinyishije uyu rutahizamu ku masezerano y’imyaka ibiri.
Uyu mukinnyi yitezweho kuba igisubizo mu busatirizi bwa APR FC, ariko azahanganira umwanya na Victor Mbaoma, Mamadou Sy na Tuyisenge Arsène usigaye ukinishwa kuri uwo mwanya.
Yabaye uwa gatatu Ikipe y’Ingabo z’Igihugu iguze muri uku kwezi nyuma y’Abanya-Uganda Hakim Kiwanuka na Denis Omedi bakina ku mpande basatira izamu.
Ibigwi bya rutahizamu mushya wa APR FC
Djibril Ouattara w’imyaka 25, wakuriye muri Vitesse FC, yabaye rutahizamu watsinze ibitego byinshi muri Shampiyona ya Burkina Faso mu 2017 na 2018 ubwo yakiniraga ASF Bobo-Dioulasso yatwaye Shampiyona icyo gihe.
Uku kwitwara neza ku myaka 18, atsinda ibitego 15 mu mwaka we wa nyuma muri Burkina Faso, byatumye ahita agurwa na RS Berkane yo muri Maroc, yakiniye imyaka itandatu, ayifasha kugera ku mukino wa nyuma wa CAF Confederation Cup ya 2018/19 no gutwara iri rushanwa mu 2019/20.
Yayifashije kandi gutwara Super Coupe ya CAF mu 2022, kugera ku mukino wa nyuma ya CAF Confederation Cup ya 2023/24 no gukina Super Coupe ya CAF mu 2021.
Mu marushanwa y’imbere muri Maroc, Djibril Ouattara yafashije RS Berkane gutwara igikombe cy’igihugu mu 2020/21 na 2021/22.
Mu mwaka w’imikino wa 2021 na 2022, yatijwe igihe gito muri OC Safi yo muri Maroc, asubira muri RS Berkane mbere y’uko umwaka wa 2022 urangira.
Muri Nyakanga 2024 ni bwo yerekeje muri JS Kabylie, kuri ubu yari amaze gukinira imikino 13 mbere yo gusesa amasezerano.
Mu Ikipe y’Igihugu ya Burkina Faso, yari mu bakinnyi batarengeje imyaka 20 begukanye umudali wa Zahabu muri ‘African Games’ aho yanabaye rutahizamu watsinze ibitego byinshi.
Yatangiye gukinira Ikipe y’Igihugu nkuru mu 2018, ndetse kuva icyo gihe yakinnye imikino 15 atsindamo ibitego bibiri birimo icyo yatsinze Cameroun mu Gikombe cya Afurika cya 2021 bahatanira umwanya wa gatatu, muri Gashyantare 2022.
Fabos Fali 
