Kuri uyu wa Mbere tariki ya 20 Mutarama 2025, Nibwo Axel Rudakubana yemereye urukiko rwa Liverpool mu Bwongereza ko yishe abana batatu abateye icyuma ubwo yari afite imyaka 17.

Yabitangaje ubwo yatangiraga kuburanishwa mu mizi ku byaha akurikiranyweho birimo ibyo yakoze tariki ya 29 Nyakanga 2024 ndetse anemera icyaha cyo kugerageza kwica abandi bantu 10 barimo abana umunani batatangarijwe amazina hashingiwe ku itegeko ryo kubabikira ibanga.

Rudakubana w’imyaka 18 kandi yemeye n’icyaha cy’iterabwoba, gikomoka ku nyandiko ya ‘pdf’ y’inyigisho z’umutwe w’iterabwoba wa Al Qaeda, zabonywe n’abashinzwe iperereza ubwo bamusakaga.

Abana batatu Rudakubana yemeye ko yishe

Kwemera ibi byaha byatunguranye kuko ubwo yagezwaga mu rukiko mu Ukuboza 2024 kugira ngo asobanurirwe ibyaha akurikiranyweho, ntacyo yasubije umucamanza.

Umucamanza Goose wayoboye uru rubanza, yatangaje ko Rudakubana arakomeza gufungwa by’agateganyo, asobanura ko uyu musore azakatirwa tariki ya 23 Mutarama.

SkyNews dukesha iyi nkuru yanditse ko abana batatu bishwe ni Alice da Silva Aguiar w’imyaka 9, Bebe King w’imyaka 6 na Elsie Dot Stancombe w’imyaka 7.

Axel Rudakubana avukira ku babyeyi bombi b’Abanyarwanda, ni mwene Alphonse Rudakubana akaba yaravukiye mu Mujyi wa Cardiff.