Nyuma y’igihe kinini abaturage bo mu karere ka Gasabo bavuga ko hari abagabo batatu bakora ibikorwa by’urugomo birimo kwiba ndetse no gufata abagore b’abandi bakabasambanya ku ngufu, Polisi y’u Rwanda yavuze ko yabataye muri yombi mu ijoro ryo kuwa 5 Mutarama 2025.

Ibi bikorwa aba bagabo batatu bakoraga babikoreraga muri Rusororo, ari bo Ishimweniryayo Eliphas wamamaye ku izina rya Badodo na bagenzi be, aho bafashwe bari kunywa inzoga ya Kanyanga itemewe mu gihugu nk’uko umuvugizi wa polisi mu mujyi wa Kigali CIP Wellars Gahonzire yabibwiye Tv1.

Abaturage bo muri aka gace bavuga ko uyu Badodo ari nawe wari uyoboye iri tsinda ry’aba bagizi ba nabi, yakoraga ibikorwa bye bibi mu bice bitandukanye kuburyo yari yarazengereje abaturage. Umwe yagize ati “badodo no kwiba ariba, ibiyobyabwenge aracuruza, arica, abana bose anyuraho agira ute, agasambanya, hari umubyeyi wimutse hano muri Karambo, yaramusambanyije arangije afata icupa amucengeza mu gitsina.”

Undi yagize ati “uyu badodo, nk’ubu aherutse gufata umugabo wanjye aramukubita avuga ko ngo ashaka kumwica akamukuraho, umva, uwo mugabo rwose akeneye gufatwa mu buryo bwose bushoboka.”

CIP Gahonzire yavuze ko Badodo na bagenzi be bakurikiranweho ibyaha by’urugomo ndetse n’ibindi byaba bigiye bitandukanye birimo kwiba mu mazu, gutegera abantu mu nzira bakabambura bakanabakomeretsa, no kwiba inka aho bagiye biba inka mu biraro bakazibaga, gusa bakaba bagikusanya ibimenyetso ngo bishyikirizwe Ubugenzacyaha.

Polisi y’u Rwanda irasaba abaturage kujya batanga amakuru ku bikorwa bibangamira ituze n’umutekano wabo kandi ku gihe, ndetse inizeza abaturage umutekano no gukemurirwa ibibazo byabo, nubwo abaturage bakunda kubikemanga, kubwo kuba baragiye babona ingero z’abafatirwa mu bikorwa by’urugomo nk’ibi, ariko bakarekurwa mu gihe kidatinze.