Fabos Fali 
Anna Kane wahoze ari umugore wa Evander Kane wamamaye mu mukino wa NHL, yabaye uwa mbere wigaragaje mu ruhererekane rw’abari baratanze ibirego bashinja P.Diddy kubahohotera ntibagaragaze amazina yabo.
Uyu mugore yari yatanze ikirego cye mu Ukuboza umwaka ushize, mu mazina ya “Ms. Doe” ariko TMZ yatangaje ko, kuri uyu wa Gatanu tariki 6 Ukuboza yahisemo gukora impinduka akagaragaza amazina ye ya nyayo nk’uko bigaragara mu nyandiko y’umunyamategeko we Douglas Wigdor.
Akora izi mpinduka mu kirego cye, yanditse ati “Nashakaga gukoresha amazina atari aya nyayo, nshaka ubutabera ku byambayeho ubwo nari nkiri mu bwangavu. Uregwa yasabye ko nakoresha amazina ya nyayo ashaka kugerageza kuntera ubwoba, ariko nta bwoba mfite. Niteguye gukomeza, gushaka ubutabera ku bangiriye nabi.”
Uyu mugore avuga ko yahohotewe na P.Diddy ubwo yari afite imyaka 17, icyo gihe ngo yahawe ibiyobyabwenge ndetse afatwa ku ngufu n’uyu muraperi afatanyije n’abandi bagabo barimo Harve Pierre wakoranye bya hafi n’uyu muraperi ndetse n’undi mugabo utaravuzwe izina.
Iki kirego kigaragaramo amafoto ya Anna icyo gihe, ariko isura ye yahishwe yicaye ku bibero bya Diddy. Avuga ko uko guhohoterwa kwamusigiye ibikomere ndetse bikamwangiriza ubuzima mu buryo butandukanye mu myaka irenga 20 ishize.
Muri Nzeri uyu mwaka nibwo P.Diddy yafunzwe akurikiranyweho ibyaha bifite aho bihuriye no gufata abagore ku ngufu, icuruzwa ry’abantu n’ibindi. Uyu mugabo ntabwo yemera ibyaha byose ashinjwa. Biteganyijwe ko azatangira kuburana muri Gicurasi umwaka utaha.
Uyu mugabo w’abana barindwi amaze kwaka kuburanira hanze inshuro eshatu urukiko rumubera ibamba.
Anna Kane avuga ko guhohoterwa na Diddy mu gihiriri n’abandi bagabo batatu byamusigiye ibikomere byinshi
Anna Kane wahoze ari umugore wa Evander Kane yagaragaje ko ari mu bashinje P.Diddy
Fabos Fali 
