Mu gitondo cyo kuwa 16 gicurasi 2023 mu mudugudu wa Gakoni, akagari ka Nyabugogo, Umurenge wa Kigali mu karere ka Nyarugenge, habereye inkuru itarigeze ahandi aho umugabo witwa Habumukiza Martin bamutesheje agerereye ibikoresho byo mu nzu iwe abitwika avuga ko ari gutwika amadayimoni y’iwabo.

Umuturage wahageze mbere ubwo yatabazwaga, akaba na visi perezida w’abunzi muri aka kagari, Mukamurenze Nadine, yabwiye Yongwe Tv ko yahageze asanga Habumukiza atwika ibikoresho byo mu nzu, ahamagara komanda wa polisi na RIB. Ngo yabwiye murumuna w’umugore wa Habumukiza ko akinga inzu, nibwo habonetse agahenge. Yavuze ko uyu mugabo ajya gutwika yahereye ku ikanzu y’umugore we yambaye basezerana, afata ibyombo, etajeri, mbese ibintu byose aratwika gusa baramutesheje babone guhamagara inzego zishinzwe umutekano.

Umuseke dukesha iyi nkuru bavuze ko nta kibazo cyihariye kizwi uyu mugabo yari afite, gusa ngo mu minsi yashize umugore we yiyambaje abanyamasengesho basengera iwe ngo kuko Atari ameze neza mu mutwe. Murumuna w’umugore w’uyu mugabo avuga ko yajyaga abima amafaranga yo guhaha ndetse akababwira ko azabica. Ngo uyu mugabo yabwiye umugore we mu minsi yashize ko yamubwira ukuri ku mwana yabyaye ngo kuko Atari we se, ko agomba kumubwira se cyangwa se akamushyira se.

Ngo nibwo umugore yabonye bikomeye ahungisha amagara ye n’uruhinja ngo kuko yabyaye abazwe, amusigira abandi bana 4 bafitanye. Kuri uwo wa 16 gicurasi rero murumuna w’umugore wa Habumukiza agiye kumusaba amafaranga yo guhaha, yamubwiye ko agiye kuyareba, ahita afata imyambaro ahereye ku y’umugore we atangira kuyitwika.

Uyu mukobwa avuga ko umugabo wa mukuru we ashobora kuba yaratererejwe ‘nyabingi’, avuga ko bamaranye imyaka 6 babana ko nta kibazo nk’iki yigeze agira. Yavuze ko uyu mugabo uretse ibyo yatwitse, yashakaga no gutwika umwana we ariko baramurwanira ntiyamutwika. Yakomeje avuga ko ubwo yatwikaga imyenda yitotombaga avuga amazina y’abantu bamwanga.

Undi muturage na we yavuze ko ubwo Habumukiza yatwikaga imyenda, yavugaga ko igihe cye kigeze agiye gukizwa, atwika imyanda. Na we yavuze ko uyu mugabo yashakaga gutwika abana be ariko baramumukiza. Yakomeje avuga ko yaba uyu mugabo ndetse n’umugore bose bari abarokore babumvaga basenga ibyo kurwana ntabyo babaziho. Ngo yavugaga ko ari gutwika abazimu b’iwabo, ngo ‘’abazimu bashye, nakijijwe’’ akanatabaza Uwiteka.

Abaturage bavuze ko uyu mugabo yajyanwa kwa muganga agasuzumwa bakareba niba Atari muzima, basanga ari muzima akaryozwa ibyo yakoze. Murumuna w’umugore w’uyu mugabo yavuze ko bafitanye abana batanu, ndetse nyuma yo gukora biriya bikorwa byose inzego z’umutekano zikaba zamutwaye.