Ku butegetsi bwa Biden, Trump yakurikiranywe n’inkiko ku byaha birimo guteza akaduruvayo mu matora yatsinzwemo mu 2020, gufata uko yiboneye inyandiko z’ibanga za Amerika, kuba inyuma y’umugambi wo kwigaragambya kwabereye ku Nteko Ishinga Amategeko ya Amerika n’ibindi.

Ni ibirego Trump yakomeje guhakana agaragaza ko aho kuba ukuri, bishingiye kuri politiki no kumuca intege ngo ntaziyamamarize kongera kuyobora Amerika.

Icyakora ubu nta n’ubwo kumukurikirana byashoboka kuko Urukiko rw’Ikirenga rwamuhaye ubudahangarwa muri nk’uwari uri kwiyamamaza kuyobora Amerika.

NBC yatangaje ko kubabarira Trump, Biden abibona nk’icyemezo cya kigabo nk’uko iki kinyamakuru cyabibwiwe n’umuntu utashatse kwigaragaza. Icyakora Ibiro by’Umukuru w’Igihugu muri Amerika (White House) byagaragaje ko icyo gitekerezo kitigeze kiganirwaho.

Joe Biden yashatse kongera kwiyamamaza kuri manda ya kabiri, ariko bibonwa ko atazatsinda Trump, abo mu ishyaka rye baha ububasha Kamala Harris bwo kwiyamamaza ariko na we Trump amutsinda uruhenu.

Ku wa 17 Mutarama 2024, Biden yababariye abarenga 2500 bari bakurikiranyweho ibyaha bifitanye isano no gukoresha ibiyobyabwenge, Joe Biden uri kubyina umutaho agaragaza ko abo bari bafunzwe mu buryo butanoze ndetse ari we muperezida ubabariye abantu benshi mu mateka y’iki gihugu.

Ikindi gikorwa aherutse gukora kitavuzweho rumwe ni ukubabarira umuhungu we witwa Hunter Biden wari ukurikiranyweho ibyaha icyenda ashinjwa bijyanye no kutishyura umusoro.

Ni imisoro igera kuri miliyoni 1,4$ yagombaga kwishyurwa hagati ya 2016 na 2019 ubwo yari mu nama y’ubutegetsi y’ikigo Burisma cy’Abanya-Ukraine na CEFC China Energy cy’Abashinwa.