Nyuma y’igihe kitari gito ikipe ya Rayon Sports ishaka umukinnyi w’umurundi Bigirimana Abed, biravugwa ko yaba yamaze kumvikana na we. Ubusanzwe Bigirimana yari asanzwe akinira ikipe ya Kiyovu Sports aho yayigezemo mu mwaka wa 2020.

Nyuma y’uko Bigirimana yari asoje amasezerano yari afitanye na Kiyovu sports, biri kuvugwa ko mukeba wayo Rayon Sports yamaze kumwegukana amakuru akavuga ko bamaze no kumvikana bagasinya amasezerano y’umwaka umwe.

Amasezerano na Kiyovu ubwo yarangiraga, uyu musore yakunze kuvugwa ko ari kugana ku miryango ya Rayon sports ariko gusinya amasezerano bikagenda bidindira kubera bimwe bitari kumvikanwaho ku mpande zombi, gusa kuri ubu amakuru aremeza ko bamaze gusinyana amasezerano.

Ikipe ya Gikundiro yakunze guhirwa n’abakinnyi bakomoka mu Burundi, kubera ko uretse abanyuzemo nkaba Amiss Cedrick, Pierrot, Mackenzie n’abandi, Bigirimana asanze abandi bakinnyi b’abarundi muri Rayon Sports harimo nka Mbirizi Eric na Aruna Madjariwa uherutse gusinya.