Mu gihe mu gihugu cya Congo hari intambara ikomeye cyane aho iki gihugu gihanganye na M23 gikoresheje ingazo zacyo FARDC n’indi mitwe y’abarwanyi bafatanije barimo FDLR, Wazalendo n’abandi, amakuru aravuga ko hari urubyiruko rw’imbonerakure z’Abarundi baaba baroherejwe muri iyi mirwano kugira ngo bakomeze gufasha Leta ya Congo muri iyi mirwano.

Imbonerakure” ni izina ry’itsinda ry’urubyiruko rw’ishyaka riri ku butegetsi mu Burundi, CNDD-FDD (Conseil National pour la Défense de la Démocratie – Forces de Défense de la Démocratie). Izina “Imbonerakure” risobanura “Abareba kure” mu Kirundi.

Pacifique Nininahazwe ni umunyamakuru akaba n’umunya politike ukunda gukurikirana amakuru y’Abarundi yose, aho abinyujije ku rubuga rwe rwa Facebook yanditse avuga ko yakiriye amakuru avuga ko hagaragaye urubyiruko rw’Imbonerakure mu gihugu cya Congo rwambaye Impuzankano y’abasirikare b’Abarundi.

Yagize ati ” Twaraye turonse ubutumwa bugira buti  “Uyo yambaye inkofero yitwa Eric Dushime. Ni imbonerakure yo ku mutumba wa Ndava-Village, zone Ndava, Commune Buganda, mu ntara ya Cibitoke. Ari mu bajabukanywe i Congo kugwanya M23.” Hari aboba bazi iyo mbonerakure Eric Dushime? Hari uwoba azi uwo wundi bari kumwe?”

Iri tsinda ry’Imbonerakure ryashinzwe nk’umutwe w’urubyiruko ushyigikira ishyaka rya CNDD-FDD, rikaba rizwi cyane mu bikorwa bya politiki no mu bikorwa bijyanye n’umutekano. Ryagiye ritungwa agatoki n’imiryango mpuzamahanga n’imiryango iharanira uburenganzira bwa muntu, bashinja bamwe mu barigize ibikorwa byo guhonyora uburenganzira bwa muntu, cyane cyane mu bihe by’amatora n’ibindi bihe bya politiki.

Nyamara, abayobozi ba CNDD-FDD bo bavuga ko Imbonerakure ari urubyiruko ruharanira iterambere, amahoro, no gushyigikira imigambi y’ishyaka ryabo.