Umuhanzi Itahiwacu Bruce [Bruce Melodie] ukubutse muri Leta Zunze Ubumwe za Amerika mu bitaramo bitandukanye harimo ibyo yakoranye na Shaggy mu rwego rwo kumenyekanisha indirimbo yabo ‘When She’s Around’ ndetse n’ikindi yakoze ku giti cye ahitwa Portland.

Bruce Melodie wagiye muri Amerika mu mpera z’umwaka ushize mu bitaramo byateguwe na iHeartRadio, yageze i Kigali mu rukerera rwo ku wa Gatanu tariki 05 Mutarama 2024 ahagana saa Munani n’igice, ahagerana na Coach Gael nyiri 1:55AM presents ndetse n’Umujyanama we Kenny.

Ubwo yari ageze ku Kibuga Mpuzamahanga cy’indege i Kanombe yasanze umugore we Catherine n’abakobwa be baje kumwakira aho bari bitwaje indabo. Ubwo yari ahageze kandi yabwiye itangazamakuru ko ananiwe cyane atabasha gukora ikiganiro ariko avuga ko mu minsi mike agiye gutangaza amazina y’abahanzi bashya agiye gufasha.

Bruce Melodie yagiye muri Leta Zunze Ubumwe za Amerika by’umwihariko bitewe n’indirimbo yakoranye na Shaggy ‘When She’s Around’ ubwo bari batumiwe kuririmba mu bitaramo byateguwe na iHeartRadio. Ndetse ubwo yari arangije kuririmba mu bitaramo bibiri yari yatumiwemo nawe yakoze igitaramo mu Mujyi wa Portland aho yaririmbiye abafana benshi bitabiriye.