Muri Hawaii, umurambo w’umuntu wabonetse mu ipine y’indege ya Kompanyi ya United Airlines, ubwo yari ikigera ku kibuga cy’indege cya Maui, nk’uko byemejwe n’ubuyobozi bw’iyo Kompanyi.

Iyo ndege yabonetsemo umurambo bitaramenyekana aho waturutse n’uko waba warageze mu ipine ry’iyo ndege ya ‘United Flight 202’, yavaga ku kibuga cy’indege cya ‘O’Hare Airport’ muri Chicago mu ijoro rishyira ku itariki 25 Ukuboza 2024, hanyuma mu gihe yari igeze ku kibuga cy’indege cya ‘Kahului Airport’, bigaragara ko hari umurambo uri mu ipine yayo. Kugeze ubu, ngo nta makuru araboneka yafasha mu kumenya uwo muntu wapfuye n’umwirondoro we.

Iyo ndege ngo yabanje gukora urugendo ruturuka ahitwa i Sao Paulo muri Brazil, nyuma ikora urudahagarara rugana i Chicago, nk’uko byatangajwe n’ubuyobozi bw’iyo kompanyi y’indege, urugendo rwamaze amasaha ane n’igice. Nyuma ikora urugendo rudahagarara (direct flight) ruva kuri O’Hare airport rugana ahitwa Maui muri Hawaii.

Ikinyamakuru CBS News cyatangaje ko Kompanyi y’indege ya United Airlines, yatangaje ko irimo gukorana n’inzego z’umutekano mu bijyanye n’iperereza rigamije kumenya umwirondoro w’uwo muntu n’uko yashoboye kugera mu ipine ry’iyo ndege ya Boeing 787-10.

Mu itangazo ryasohowe n’umuvugizi wa United Airlines yagize ati “Iryo pine kuryinjiramo byashobokaga gusa ku muntu uri hanze y’indege. Kugeza ubu, ntibirasobanuka uko byagenze n’igihe byabereye kugira ngo umuntu ashobore kwinjira muri iryo pine”.

Polisi ya Maui, mu itangazo yasohoye, yavuze ko “Ishami rya Polisi ya Maui, ririmo gukora iperereza rikomeye rigamije kumenya uwo muntu wapfuye, wabonetse mu ipine ry’indege. Kugeza ubu, nta makuru menshi araboneka”.