Nyuma y’uko Urukiko rw’Ibanze rwa Nyagatare rwanzuye ko uwari Guverineri w’Intara y’Iburasirazuba, CG (Rtd) Gasana Emmanuel akurikiranwa afunze, yamaze kugera muri gereza ya Mageragere kugira ngo uyu mwanzuro ushyirwe mu bikorwa.

Ibi byemezwa n’Umuvugizi w’Urwego rw’Igihugu rushinzwe Igorora (RCS), SP Daniel Rafiki Kabanguka, wavuze ko Gasana yakiriwe mu Igororero rya Nyarugenge ahazwi nka Mageragere. Kuwa 15 Ugushyingo 2023 nibwo Urukiko rw’Ibanze rwa Nyagatare rwafashe uyu mwanzuro.

Umucamanza warwo yavuze ko Gasana afungwa iminsi 30 y’agateganyo kubera ko afite impamvu zishobora gutuma abangamira iperereza. Umucamanza yavuze ko umwanzuro wafashwe hashingiwe ku byaba bikomeye aregwa birimo  gusaba no kwakira indonke ngo akore ibiri mu nshingano ze no gukoresha ububasha mu nyungu ze bwite.

Yavuze ko buri cyaha gihanishwa igifungo kiri hejuru y’imyaka ibiri bityo Gasana akaba agomba gukurikiranwa afunze. Urukiko rwavuze ko ingwate yatanzwe na Dr Kamugundu David wasabaga kumwishingira ifite agaciro ka miliyoni 307frw iramutse yemewe byabangamira iperereza.