Fabrice Nahimana Umukandida ku mwanya wa Perezida wa Repubulika muri Colombia, Miguel Uribe Turbay, yarashwe inshuro eshatu ubwo yari mu bikorwa byo kwiyamamaza mu Murwa Mukuru w’icyo gihugu, Bogota.
Muri izo nshuro eshatu, amasasu abiri yamufashe ku mutwe, irindi rimufata mu ivi, ibituma ajyanwa kwa muganga igitaraganya, aho umugore we, Maria Claudia Tarazona, yasabye abantu kumusengera ’kuko ari kurwana n’ubuzima.’
Amatora y’Umukuru w’Igihugu ategerejwe mu mwaka utaha, aho byitezwe ko uyu mugabo w’imyaka 39, ari umwe mu bafite amahirwe, ahanini kubera uburyo ashyigikiwe n’urubyiruko.
Ishyaka rye, Centro Democratico party, ryanenze iki gikorwa rivuga ko kibangamira demokarasi muri icyo gihugu, mu gihe Perezida Gustavo Petro yasezeranyije gukora iperereza ryimbitse, abari inyuma y’uyu mugambi bose bakabiryozwa.
Umwana w’imyaka 15 ni we umaze gutabwa muri yombi, aho akekwaho kurasa Miguel Uribe.
