Fabos Fali 
Umunya-Portugal Cristiano Ronaldo agiye guhabwa amasezerano mashya muri Al-Nassr, azaba afite agaciro ka miliyoni zirenga 167.9£, ndetse agahabwa 5% by’imigabane muri iyi kipe, akajya agira n’uruhare mu kugura abakinnyi.
Ronaldo yerekeje muri Al-Nassr yo muri Arabie Saoudite muri Mutarama 2023 avuye muri Manchester United.
Akihagera yasinye amasezerano afite agaciro ka miliyoni 86£ ku mwaka, ariko yiyongeraga kubera kwamamaza ndetse n’ava mu baterankunga b’ikipe.
Mu mpera z’uyu mwaka w’imikino Ronaldo azaba ageze ku mpera z’aya masezerano, ndetse akaba yaramaze gutangaza ko yaryohewe n’ubuzima bwo muri Arabie Saoudite adateganya kuhava.
Mu gihe yaba yongereye amasezerano muri Al-Nassr, yajya ahabwa miliyoni zirenga 167.9£ ku mwaka, bivuze ko ari miliyoni £3.19 ku cyumweru, wayagabanya akaba ibihumbi £419,800 azajya yinjiza buri munsi.
Ibi bituma akomeza kuba umukinnyi wa mbere uhembwa amafaranga menshi, nyuma y’uko mu mwaka wa 2024, Forbes igaragaje ko ari we wari uyoboye urutonde rw’abakinnyi binjiza agatubutse, akurikiwe na John Rahm ukina Golf, Lionel Messi wa Inter Miami na LeBron James ukinira LA Lakers muri NBA.
Si ibyo gusa kuko uyu mukinnyi kandi azajya agira uruhare mu bakinnyi binjira muri iyi kipe, kuko azaba ari umwe mu banyamigabane bayo afitemo igera kuri 5%.
Kuva yagera muri Al-Nassr, Ronaldo w’imyaka 39 amaze kuyifasha gutsinda ibitego 75 mu mikino 84 yayikiniye, akaba amaze gutwarana na yo igikombe kimwe gusa cya ‘Arab Club Championship 2023’.
Al-Nassr iri ku mwanya wa gatatu ku rutonde rw’agateganyo rwa Saudi Pro League, aho ifite amanota 28, ikarushwa icyenda na Al-Hilal na Al-Ittihad ziyiri imbere.
Fabos Fali 
